Semifinal-ah Aslan Karatsev a lut

World number 114 Aslan Karatsev chuan Australian Open khelh laiah thawnthu ngaihnawm a ziak zel. Qualifier paltlang chunga inlan ve hram hram hian nimin khan Grigor Dimitrov hnehin semifinal a inhlangkai.

Rod Laver Arena, Melbourne Park a inkhelah Karatsev hian darkar hnih leh minute 32 chhung lekin seeded 18-na Dimitrov hi 2-6, 6-4, 6-1, 6-2 in a hneh a, semifinal-ah chuan Novak Djokovic leh Alexander Zverev inkhela chak zawk a hmachhawn leh ang.

Kum 27 mi Karatsev hi a ranking a hniam em avangin qualifier a khelh hmasak a ngai a, inelna tak a khelh chinah pawh beisei aia ṭhain a khel zel. Open Era chinah Grand Slam khelh vawi khatnaa semifinal lut thei hmasa ber a ni hial.

Karatsev chuan, "Engkim mai hi a makin a nuam em em vek. A vawi khat nan Grand Slam ka khel a, ka chak zel. Tunah chuan semifinal hial ka thleng ta, hlim leh lawmna tur hlir a ni," a ti.

Russian tlangval hian Australian Open hma khan tennis a khelh aṭanga a sum hlawh chhuah zawng zawng chu $618000 (Rs 4,49,50,662) a ni a, tun ṭuma semifinal a luh vang ringawta a dawn tur $662000 (Rs 4,81,51,033) hi a tam zawk hial.