Portugal-ah Ronaldo a kir dawn

Cristiano Ronaldo nena inzawm tlat chu a pianna Portugal a ni a, "Portugal-a him dam taka zin tur chuan dan pakhat zawm ngei ngei ngai a awm a, chu chu Ronaldo hi khawvela footballer ṭha ber a nih thu pawm a ni," tiin fiamthuin an sawi ṭhin. 

Chutiang taka a ram mi leh sa ten an ngaihsanna ramah chuan Ronaldo a kal dawn a, mahse, tun ṭum erawh Portugal tana thangchhuah tur ni loin Portuguese club petchhuah tum zawkin a ni a kal dawn ni. 

Zanin dar 1:30-ah Champions League last 16 first leg match khel turin Porto chuan Juventus an mikhual dawn a, Italian club jersey nena inlan tur Ronaldo chu mipui mit fukna tur a ni leh ang. 

Ronaldo hian tun season inelna hrang hrangah match 26 khela goal 23 khungin assist vawi thum a nei leh tawh a, Porto lakah a inthlahrung lo tura ngaih a ni. 

Real Madrid legend Ronaldo-a'n kum 2018 khan Santiago Bernabeu chhuahsanin Juventus a pan a, Italian club-in Ronaldo an lakluh chhan hi Champions League nomawi chawi an duh vang a ni. 

Ronaldo-a'n Juve-ah season hnih chhungin Serie A nomawi a chawi ve ve a, club tan top scorer-a la ni ve ve bawk. Turin club-a pan hnuah inelna hrang hrangah match 115 khelin goal 88-a khung bawk a, a nep lo hle. 

Mahse, tarlan tawh angin Juve-in Ronaldo an lakluh chhan chu Real Madrid tana Champions League nomawi pali chawi thei hian European champion a nih pui theih an beisei vang a ni a, an beiseina erawh a la hlawhtling thei lo. 

Kum 36 mi forward hian Juve-a a season hmasa berah Champions League quarterfinal a khel ṭawk a, season hmasa khan last 16 aṭangin Lyon chuan an pet chhuak bawk - a kum a tam tawh avangin Ronaldo-a'n chance a nei tam tawh lo a, a ropuina belhchhah turin kuminah champion a mamawh. 

Inrinni zan khan Serie A inkhelah Juve-in 1-0 in Napoli an ngam lo a, league-ah palina an ni mek - hmahruaitu Inter Milan chu match khata khel tlemin point riatin an phak lo mek. 

Coach tuaitir Andrea Pirlo kaihhruaina hnuaiah Juve an ropui lo a, an 'ta' saa an ngaih ṭhin Serie A pawh an thlirliam mek lai hian Champions League chu beisei ngam chi a ni dawn em ni? tih chu zawhna awm thei tak a ni. 

Player rilru paukhauh leh huaisen Ronaldo erawh a hnual phah lo. Portuguese forward chuan, "Napoli laka kan tlawm avang maiin kan hnual phah dawn lo. Indawmkun a rem lo a, Champions League ngaihtuah a ngai a ni," a ti. 

Ronaldo tan beiseina sang mah se a mak lo; Porto-in season ṭha an hmang bik lo miau a! Portuguese club hian inelna hrang hranga an match hnuhnung paliah draw result vek an nei a, Primeira Liga lamah hmahruaitu Sporting Lisbon chu point 10-in an phak lo mek. 

Zanin inkhel tur hian danglamna tak pakhat a nei dawn a, chu chu Real Madrid leh Portugal tana khel dun ṭhin Ronaldo leh Pepe an intawng tur hi a ni - kum 37 mi Pepe hian Porto tan a khel mek. 

Portugal centre back chuan, "Hnehna kan chan ngei ka beisei a, mahse, a awlsam dawn lo. Ka ngaihdanah chuan Juve hian khawvela footballer ṭha ber Cristiano an kawl a, ani hi ka la hmachhawn ngai lo. 

"Pepe leh Ronaldo inkhel tur ni loin Porto vs Juventus a nih vangin inkhel special bik a ni dawn a, Juve hi kan la hneh ngai loh avangin a vawi khat nan kan hneh theih ka beisei," a ti. 

Hriat tel tur chu Juventus hian kum 1996 hnuah Champions League nomawi an chawi leh tawh lo a, final vawi nga an khel leh tawh thung - Porto nen hian vawi hnih ve ve an champion tawh a, zaninah final kalkawng inchhut tawpsak an tum ang. 

Juventus tan Napoli laka inhliam, an player pawimawh Juan Cuadrado chu a inlan thei dawn lo a, Arthur, Paulo Dybala leh Aaron Ramsey-te chu inlan lo tura ngaih an ni bawk. 

Tlarhmaah Champions League-a goal 134 khung tawh Ronaldo chu season hmang ṭha tak  Alvaro Morata nen inkawp tura ngaih an ni a, kum 28 mi Morata hian Champions League match rukah goal ruk khunga assist a neih avangin Porto tlarhnung ten Ronaldo-ah chauh an rilru an pek chuan an chesual ang.

Porto hian full back pahnih Nanu leh Zaidu Sanusi bakah midfielder Otavio chu hliam vangin an chhawr theih a rinawm loh a, midfielder Jesus Corona chuan hremna a tawrh zawh tawh avangin bul a ṭan thei thungin a rinawm. 

Real tan tlarhma pathum, inelna hrang hrang match 29-a goal kua khunga assist vawi nga nei thei Moussa Marega, match 29-a goal 14 khunga assist vawi kua nei thei Mehdi Taremi leh match 27-a goal kua khunga assist vawi nga nei tawh Luis Diaz-te ngaihthah loh a ṭha ang.