Sunil Chhetri a la chuai lo

Bengaluru FC tana match 200-a khelhnaah Sunil Chhetri chuan goal hnih a khung a, Indian striker hian kum 36 ni tawh mah se innghahna tlak a la nihzia a pholang leh ta. 

Thawhṭanni zan Indian Super League inkhelah Bengaluru-in Mumbai City an barakhaih a, 4-2 in an hneh - Bangalore club tan Cleiton Silva chuan minute 22 chhungin goal hnih a khung hman a, ISL club hmuhnawm ber pawl Mumbai an barakhaih chiang hle. 

Second half ṭan aṭanga minute ngana lekah Adam le Fondre chuan Mumbai tan si phurh a sut ṭhen a, mahse, Mumbai club harh tak tak hmain Chhetri-a'n minute 57-naah an goal thumna a khung. 

Bolton Wanderers striker hlui Le Fondre-a'n an beiseina thi mai tur chhem nung turin minute 72-naah khung leh mah se Bengaluru-in Chhetri an nei a, India captain hian hun pek belh minute linaah an goal lina khungin a team a chakpui. 

Chhetri hian tun season ISL-ah goal sarih khungin assist vawi hnih a nei tling leh ta der a, club tana goal heti zat hlawh chhuak tur hian league match 18-a mamawh. 

Mizo rawlthar Edmund Lalrindika chu minute 82-naah luhtir a ni a, Chhetri goal khung hi Lunglei striker Edmund-a siamsak a ni. 

Bengaluru-in hnehna an chan avangin semifinal khelh an beiseina chu a nung thar ve leh ta a, an hmabak match hnihah FC Goa leh Jamshedpur an awm avangin hna erawh a awlsam lo ang.