NE Elite Boxing C'ship Zochhuana leh AwP-a ten gold la

North East Zone Elite Boxing Championship 2019,  Chirang, Assam-ah khelhah Zochhuanawma Fanai (69 Kg)  leh Lalawmpuia (75 Kg)  ten Mizoram tan gold medal an hnek chhuak.

Lalnunzira (60 Kg) leh Zomuansanga (64 Kg), te silver medal-ah an lungawi a ṭul thung a; Mizoram hian mipa inelnaah boxer pasarih tirin gold, silver leh bronze pahnih ṭheuh an la. Republic Veng tlangval Zochhuanawma Fanai hian final lut turin L. Kima (Nagaland) leh Kh Sanamacha Singh (Manipur) te chu unanimous decision hmangin a hneh a, gold medal inchuhnaah hian Assam boxer Gonunjit Singh chu round hnihna lekah technical knockout hmangin a hneh.

Khuangthing tlangval Vanlal-awmpuia hian gold medal la turin Erick Khongsit (Meghalaya), Th Iboyaima Singh (Manipur) leh Debojit Borah (Nagaland) te a hmachhawn a, knockout vekin a chak. Final-ah hian AwP-a'n hnehna chang turin round khat bak a mamawh lo.

Siaha tlangval Lalnunzira leh Khatla South tlangval Zomuansanga te erawh final-ah an khingpui Poken Siga (Arunachal Pradesh) leh My Myson (Manipur) te lakah an vanduai. Boxer dang pahnih F. Zoramchhana (56 Kg) leh Hmingthanmawia (49 Kg) ten bronze medal an la bawk. Hmeichhe inelnaah TC Lalremruati'n (ITI Veng) bronze medal a la. Vanlalhriatpuii (Champhai) leh Abisak Vanlalmawii (Mission Vengthlang) ten final an lut a, result kan hre hman lo.