Bolton Wanderers an him ta!

Premier League thlenga kan lo hmuh fo tawh Bolton Wanderers chu Bury FC anga English Football League aṭanga paihchhuah theih dinhmunah ding hman mah se Nilaini zan khan chhanchhuahin an awm a, League One an khelh chhunzawm zel dawn. 

Bolton hi Nilaini khan an buaina chingfel turin ni 14 chhung hun pek an ni tih hriattir an ni a, hetih chhunga an inchingfel hman lo a nih chuan English Football League aṭanga paihchhuah tur an ni. Mahse, thin phu dep depa an club chanchin ngaichangtu fan-ten  Nilaini zan khan thu hriat lawmawm an hria a, Football Ventures Limited chuan Bolton hi an lei. 

Premier League club hlui hian neitu thar an neih tak avangin EFL aṭanga paihchhuah an ni leh dawn lo tihna a ni a, League One-ah kan hmuh chhunzawm ang. 

Mizo ten English football kan hmelhriat hnua Bolton vul lai ber tia sawi ngam chu Sam Allardyce enkawlna hnuaia 1999-2007 inkara an khelh kha a ni a, Big Sam hi 2001-02 season a Premier League khel tura Bolton hruaikir lehtu a ni.  

Big Sam hnuaia English midfielder Kevin Nolan, Finland goalkeeper Jussi Jaaskelainen, Nigerian attacking midfielder Jay-Jay Okocha, English striker Kevin Davies, Spanish midfielder Iván Campo leh Greek winger Stelios Giannakopoulos te inkhel kha an hmuhnawm ṭhin hle. 

Spanish legend Fernando Hierro leh Japanese midfielder lar ṭhin Hidetoshi Nakata te pawhin an hun tawp hman nan an hmang kha a ni a, Portuguese forward Ricardo Vaz Tê, France forward Youri Djorkaeff leh Nicolas Anelka te hming lam hmaih pawh a har viau. 

Player langsar tak tak lo khelh tawhna club an nih avangin Bolton dinhmun hian mi tam tak a ṭhawng a, EFL-a an him hram theih chu football fans tam tak ṭawngṭaina a ni. 

Sum lama tlachhia Bolton hian player leh staff-te hlawh an pek theih loh avangin season pawh point 12 paih sak sa ni chungin an ṭan a, kar hmasa khan Doncaster Rovers nena an inkhel tur pawh an ṭhulh hial. 

Club chhungkaw buaina avang hian Bolton Wanderers manager Phil Parkinson leh assistant Steve Parkin te chu kar hmasa khan an bang tawh a, senior player-in an chhuahsan nual avangin tun season-a match nga an khelh tawhah youth team player an chhawr nasa hle bawk. 

Doncaster nena an inkhel tur an ṭhulh hnu hian Inrinni khan Bolton hian Ipswich Town an mikhual a, fans 5,454 chiahin an inkhel hi a hmunah an en! University of Bolton Stadium-a kum 22 an inkhelh chhunga fans an kalkhawm tlem ber ṭum a ni a, fan-ten thathona an nei tawh lo. 

Nilaini zanah Bolton-in neitu thar an neih thu an puang a, English club leh Ventures indawrna atana hnathawktu Paul Appleton chuan, "Kan beisei anga a tawp kan khar thei hi ka lawm takzet a ni," a ti. 

Club neitu thar Football Ventures pawhin thuchhuah siam ve nghalin, "He club ropui tak kan khai chhuak leh thei ta hi kan lawm takzet," an ti a,  fans, club staff leh player-te tana tha an thawh thei chu an lawm thu an sawi bawk. 

EFL executive chair Debbie Jevans chuan, "Tun hnaia kan thil tawn hi a khirh takzet a, duh ang taka engkim a kal thei ta hi a lawmawm hle," a ti. Hetihlai hian Nilainia an inchinfel hman loh avanga EFL aṭanga paihchhuah ni ta Bury FC chuan social media kaltlangin Bolton an lawmpui thu an tarlang.