Neymar chungchangah PSG leh Barca inbia

Paris St-Germain leh Barcelona thuneitute chu Paris khawpuiah Neymar chungchang sawiin an indawr a, club pahnih aiawhte hian inbiakna ṭha tak an neih thu an sawi. 

Brazil forward Neymar hian kum 2017 khan Barcelona aṭangin PSG hi pound maktaduai 200-in a pan a, khawvela footballer manto ber record a siam. Khawthlang media te tarlan dan chuan Catalan club hian Neymar hi loan-a hawh phawt a, a ngheta pound maktaduai 153-a lei an duh. 

Hetihrual hian loan-a kum khat an hawh man tur ringawt pawh hi pound maktaduai 31.6 a tling ang. Barca hian pawisa sawi ang zat pe kher lo hian player pek tel ang zawngin an kalpui mai thei. PSG hian Ousmane Dembele chu Neymar mana kal tel tura lakluh an pawiti lo nia sawi a awm a, Croatian midfielder Ivan Rakitic chu kal tel turin a hming a ri ring viau bawk. 

Neymar hi Real Madrid leh Juventus pawhin lakluh an duh a, mahse amah ber hian Barcelona-a kir ngei duhin PSG hotute a nawr niin an sawi. PSG nena inbiakna an neih zawh hian Barca board member Javier Bordas chuan inbiakna an chhunzawm tur thu a sawi a, tun dinhmunah an inbiakna chu a kaltluan thu media a hrilh. 

Neymar hi PSG tan season hnih a khelh chhungin hliam vangin talbuai mah se match 58-ah a inlansak hman tho a, goal 51 a khung. French football-a nomawi chawi theih ang chawi kim mah se an lakluh chhan ber Champions League nomawi erawh a la chawipui lo thung.