Subroto Cup Under 14-ah Saidan Secondary School, Mizoram an champion
Subroto Cup International Football tournament Sub Junior-ah Saidan Secondary School, Mizoram chuan Unique Model Academy, Manipur chu 2-0 a hnehin an champion a, cheng nuai thum leh nomawi an dawng. Final-a goal hmahruai khungtu Romalsawma chu best player-ah thlan a ni a, Mualṭhuam North naupang hian tun inelnaah goal nga a khung.
Nimin khan Dr. Ambedkar Stadium, New Delhi-ah final hi khelh a ni a, Kolasib-a awm Saidan Secondary School hian inkhel an thunun hle. First half-ah Romalsawma'n minute 6-na lekah goal hmahruai a khung a, captain Lalhunmawia'n penalty hlah mah se Kolasib naupang Hunmawia hian minute 43-naah chak nemnghehna goal a khung ta tho. Mizoram captain Hunmawia hian tun inelnaah hian goal 17 a khung..
Kumin Subroto Cup hi kum 60-na a ni a, Diamond jubilee edition a ni hian nomawi hlutna a belhchhah. Saidan Secondary School hi SYS coach leh Champhai District Football Assn honorary secretary ni bawk Lalbulliana leh Lalthawmmawia (manager) ten an kaihruai a, inelnaah hian tema ṭha ber niin match ngaah goal 33 khungin goal thum chauh an chhuah.
Mizoram coach Lalbulliana chuan, "Mizoram aṭangin min ṭawngṭai sak nasa a, Delhi-a Mizo awmten min ṭawiawm ṭha bawk. Kan naute an thawkrim a, khelmualah theihtawp an chhuah rah kan seng. Kan champion thei hi kan lawm takzet a, Pathian malsawmna a ni," tiin Vanglaini a hrilh.
Vawi 5-na
Subroto Cup Sub Junior (kum 14 hnuai lam) inelnaah Mizoram hian kum 2002 khan Holy Heart School hmingin a vawi khat nan an champion a, kum 2003-ah pawh Holy Heart School hming bawkin an champion.
Mizoram hian nomawi chawi leh lawk loin Government Chawngfianga Middle School hmingin kum 2013 leh 2015 khan an champion leh a; tun ṭuma coach Lalbulliana hoa an champion hi Under 14 bika Mizoram vawi nga champion-na chiah a ni.
Champion Kalkawng
Group Stage
Mizoram 9–0 Tripura
Mizoram 12–1 Andra Pradesh
Quarterfinal
Mizoram 8–1 Chandigarh
Semifinal
Mizoram 2–1 Assam
Final
Mizoram 2–0 Manipur