Hliam tuar Novak Djokovic a tlang

Flushing Meadows, New York-ah Novak Djokovic chuan hliam tenau nei mah se Juan Ignacio Londero a paltlang tho a, Serbian tlangval hian vawi thum a champion tawhna US Open second round a paltlang.

Nimin zing inkhel dangah Roger Federer-a'n Damir Dzumhur hnehin third round a lut ve bawk. Federer leh Djokovic te hi an kaltluang zel a nih chuan semifinal-ah an inhmachhawn thei dawn, thleng ngei se tih chu tennis ngaina tute duhthusam a ni.

World number 1 Djokovic chu Londero nen darkar hnih leh minute 15 an inkhelh chhungin vawi thum ngawt a dar (shoulder) hliam vangin enkawl a ngai a, heti chung hian 6-4, 7-6 (7-3), 6-1 in hnehna a chang thei tho.

Tun hnai Grand Slam khelh hnuhnung panga zinga vawi lia champion thei Djokovic hi tun ṭumah pawh hian rinkai ber a ni. Mahse, inelna neih ṭan hma khan a ke durh vangin a buai a, tunah hliam tenau dang a neih leh tak avangin an dinhmun tur hriatthiam a har rih ta hle.

Kum 32 mi Djokovic chuan, "Ka dar na khan service leh backhand kawngah harsatna min siamsak, hetianga ṭha hian match ka khel zo thei ang tih ka ring phak lo. Set hnihna harsa taka kan khelh laia ka che fuh hlauh khan kawng a ti awlsam," tiin a sawi.

Beiseina a neih thu sawi zawmin, "Grand Slam-ah hi chuan match kar lakah nikhat chawlh kan nei a, a vanneihthlak hle. Inenkawlna ṭha ka neih avangin match khelh leh hmain dam hman ka beisei," a ti.

Ruah sur vangin Arthur Ashe Stadium chungkhuhna hman a ni a, tawnhriat ngah Roger Federer chu a tir lamah buai deuh mah se a harh chhuak har lo; a khingpui Damir Dzumhur chu 3-6, 6-2, 6-3, 6-4 in a hneh.

Grand Slam vawi 20 champion tawh Federer hi a match hmasa ang bawkin set khatnaah a buai, unforced errors vawi 17 ngawt neiin set a hloh! Amaherawhchu, set hnuhnung pathum erawh a thunun tluan vek a, world number 99 Dzumhur tan thaw lakna hun a siamsak nawn tawh lo.

World number 3 Federer chuan, "Set khatna ka hloh a, a hnu lam erawh ka la vek. Ka match khelh dan hi a ṭha ber chu a ni rih lo, chutihrualin dinhmun hniam zawka din hnua thawhchhuah theih hi chu chanchin ṭha a ni a, thahrui khek theih erawh duhthusam a ni," a ti.

Swiss star hian US Open nomawi vawi nga a chawi tawh a, amaherawhchu New York khawpuia a hlawhtlin hnuhnung ber chu 2008 daih tawh kha a ni. Season 15 zet a liam hnuah ropuina a chang leh thei ang em tih chu hriat châkawm tak a ni.

Asian tlangval zinga thleng sang ber Kei Nishikori chu a tlang zel. Japanese tlangval hian third round lut turin Bradley Klahn chu darkar hnih leh minute 43 chhungin 6-2, 4-6, 6-3, 7-5 in a hneh, world number 108 lakah set khat hloh ve bawk mah se harsatna lian tham a tling lo.

Seeded pasarihna Nishikori hian 2014 US Open-ah khan final a lut a, nomawi chawi phak chiah lo mah se Grand Slam bikah chuan a thlen san berna hmun a ni. Major tournament a khelh hnuhnung pangaah quarterfinal chin tal a thlen zel avangin tun ṭumah pawh a thlen san a rinawm.

Croatian tlangval Borna Coric chu hnungzâng na vangin a inhnukdawk, a khingpui tur world number 3 Grigor Dimitrov chu inkhelh hah ngai loin a tlang. Season hmasa lama US Open fourth round lut thei Coric chuan, "Tun dinhmun thlen tawh hnua inhnuhdawh ngai chu a hrehawm takzet," a ti.