Australia, New Zealand? Pakistan? Sri Lanka ?
Cricket World Cup 2019-ah group match sarih chiah khelh tur a awm tawh a, semifinal lut tur a la hriatkim loh avangin a ngaihnawm tulh tulh. Zirtawpni zan khan tla tawh South Africa chuan semifinal luh inbeisei Sri Lanka chu wicket kua zetin an sawp a, Lions beiseina erawh a la mit bik lo.
Inrinni inkhelah Pakistan-in wicket thumin Afghanistan an hneh hram a, point hnih hmangin knockout stage luh beiseina a nung thar. Tling tawh Australia-in New Zealand run 86-in an hneh a, Black Caps hian an elpui England an la hmachhawn dawn avangin tla thei an la ni.
Hun ṭha bawhpelh
Sri Lanka-in South Africa lakah chak mamawh mah se over 49.3-ah run 203 siamin an thi vek. Lions batsman zinga siam tam ber pawhin run 30 bak an siam loh avangin hun ṭha an bawhpelh a, South Africa bowler-te an che ṭha hrim hrim bawk.
Proteas-in hnehna chang turin harsatna an tawk lo a, wicket khat chauh hlohin an target hi an umpha. Veteran player Hasim Amla (80*) leh captain Faf du Plessis (96*) te an che ṭha a, amaherawhchu beisei tur an neih tawh chuan loh avangin an che ṭha tlai a tih theih.
Pakistan Shaheen
Pakistan bowler Shaheen Afridi a che ṭha leh a, wicket li ngawt lain run 47 chauh a pe a, team nem ber Afghanistan-in over 50-ah 227/9 chauh an siam. Amaherawhchu Sarfaraz Ahmed hoten awlsam takin hnehna an chang lo a, ball hnih chiah dah bangin target an umpha hram.
Pakistan captain Sarfaraz Ahmed chuan, "Mipuiin ball zawng zawngah thawm an rawn nei a, player-te an au phur ṭha hle. Pitch khelh harsa tak a nih avangin hnehna kan chang hi a hlu hle," tiin a sawi.
Champion lai nge nge
New Zealand tan Trent Boult-a'n hattrick siam mah se Australia-in Usman Khawaja run 88 siam zarah run 243 an tlin ta tho. Champion lai Australia danglamna a lang a, champion ṭuma man of the tournament Mitchell Starc-a'n wicket nga zet lain Black Caps hi run 157-ah an thi vek.
New Zealand captain Kane Williamson chuan, "Kan khelhna pitch kha a harsa a, keini aiin Australia-in an khelh dan hmang kha an hrethiam hmasa zawk a ni," tiin a sawi. Black Caps hian inelna thlengtu England an la hmachhawn leh dawn a, semifinal inchuh boruak hi nimina India leh England inkhelin nghawng lian tak a nei dawn. Eoin Morgan-a hoten Virat Kohli hote an hneh a nih ngai chuan New Zealand leh England inkhel tur hi quarterfinal ang hiala chhal theih a ni ang.