Wimbledon Djokovic inlan nghal dawn

Tennis tournament upa ber Wimbledon chu vawiin aṭangin All England Lawn Tennis leh Croquet Club-ah khelh ṭan a ni dawn a, inelna neih ṭan zan hian mipa singles champion lai Novak Djokovic a inlan nghal ang.

Grass court inelna lianah Djokovic hian player tawnhriat ngah Philipp Kohlschreiber a hmachhawn ang. German tlangval nen an intawn tawhnaah Djokovic hian 28-6 in hma a hruai fal, kuminah pawh Australian Open leh Madrid Open-ah intawngin Djokovic a chak ve ve.

Kum 32 mi Djokovic chuan, "Wimbledon hi chu inelna dang daih a ni a, world number 1 leh seeded pakhatna nichungin ka inlan dawn a, ka chungah mipui mit pawh a fu ang. Ka khingpui apiangin result danglam neih an chak dawn avangin fimkhur a ngai dawn hle," tiin a sawi.

Hun rei tak chhung Roger Federer leh Rafael Nadal ten tennis khawvel an awpbehna karah Djokovic hi rawn talput thei a ni a, Serbian tlangval hian player ropui pahnih inelna kara lo tel ve chu hautak hle mah se amah chher hriamtu an nih thu a sawi.

World number 1 Djokovic chuan, "Federer leh Nadal an kal vung em avangin ka hun hmasa lamah kha chuan nomawi liantham ka chawi ngai meuh lo, a nihna takah chuan ka bei pawh a dawng ve hman hle. Mahse, hun a inher zel a, anni pahnih hian ka nih tur aia sang zawk ka nih theih nan player hriam zawkah min siam a ni," a ti.

Djokovic hian Grand Slam pali zinga pathum a kawl khawm mek a, thla hmasa mai khan French Open-ah erawh Nadal a ngam lo hle. Wimbledon-ah hian seeded pakhatna pek a ni a, tluang taka an khel zel thei a nih chuan final hmain a khingpui tur aiin ni khatin hahchawlhna hun a nei tam hret dawn.

Grand Slam vawi 15 champion tawh Djokovic chuan, "Inelna hi mi pahnih tan a ni bik tawh lo a, player pathum kan ni," a ti. Federer, Nadal leh Djokovic te pathumin major title an lak zat belhkhawm chu 53 zet a ni a, player dang tan an zuah meuh lo.

Wimbledon a nih tawh chuan Federer hi mipui ngaihven a ni ṭhin a, Swiss star hi 'Darling of Centre Court' tiin an sawi hial ṭhin - ani hian Thawhlehniah Lloyd Harris a hmachhawn ang. Vawi hnih champion tawh Nadal chuan Asian player Yuchi Sugita a hmachhawn thung dawn a ni.