Hmeichhe World Cup Germany barakhaihtu Sweden-in semifinal lut

World champion vawi hnih ni tawh Germany-in an beisei loh result an hmu a, Sweden lakah 1-0 a hma an hruai zet hnuin an tawlhthlu. 

Sweden hian 2-1 in Ger­many an lehthal a, rin hlawh lo zawkin semifinal an lut. Quarterfinal inkhel dangah Netherlands chuan 1-0 in Italy an hneh bawk a, Sweden nen hian final luh an inchuh ang. USA-in an ram President Donald Trump nen boruak an neih karah nomawi an hnaih zel a, semifinal lut turin inelna thlengtu France chu Zirtawpni zan khan 2-0 in an hneh ve bawk. 

England-in Norway hnehin semifinal an lo lut tawh a, World Cup-a a sang pali zinga la tel ziah USA nen hian semifinal-ah an inhmachhawn ang. 

Inelna ṭan a nih hma hauh aṭangin Germany chu champion tura beisei zinga mi an ni a, an hming pawh a ri ring hle - he team hian World Cup vawi sarih an khelh tawhah vawi hnih chiah quarterfinal an paltlang zo lo. 

Vawi hnih an champion a, vawi khat pahnihna an ni a, vawi hnih dang semifinal an lut bawk - mahse tunah chuan a vawi thum nan quarterfinal an paltlang lo ve leh ta a, thawnthu ziah danglam a ni ta. Germany tan hian Lina Magull chuan minute 16-na lekah goal hmahruai khung mah se Sweden-in Sofia Jakobsson leh Stina Blackstenius hmangin an chhanglet a, Germany-in a chhanletna tur an nei tawh lo. 

Rio Olympics 2016-a hmeichhe football gold medal latu Germany-in World Cup semifinal an luh zawh loh avangin 2020 Olympics hmeichhe football an khel dawn lo tihna a ni a, gold medal dawngtu thar kan hmu dawn. 

European champion Netherlands hmeichhe football team-in World Cup an khelh vawi hnihnaah semifinal an lut nghal a, Italy chu 2-0 in an hneh. 

Netherlands tan hian Vi­vianne Miedema leh Stefanie van der Gragt te chuan second half-ah goal khat ve ve an khung a, Italy-in a chhanletna tur an nei lo. Kum 2015 khan Netherlands hian a vawi khat World Cup an khel ve chauh a, last 16 an lut nghal. Kum 2017-ah European champion an ni zui a, World Cup semifinal hial an lut ta.

Italy nena an inkhelhna hmun Valenciennes, France hi Netherlands ramri aṭangin darkar hnih vel lek tlan a ni a, quarterfinal-ah Dutch team-in ṭantu an nei ṭha hle. 

US star player Megan Rapinoe-i'n World Cup nomawi chawi pawh ni se US President chenna White House a tlawh loh tur thu a sawi a, hei hi Donald Trump chuan hrethiam loin Rapinoe hi na takin a khak. Mahse, Zirtawpni zana France an hmachhawn zanah Rapinoe-a talbuai phah lo a, "I ṭawng hmain hnehna chang phawt ta che," tia amah zilhtu Trump chhanlet nan goal hnih a khung. 

Rapinoe hian minute 5-na leh 65-naah goal a khung a, France-in minute 81-naah Wendie Renard hmangin an chhanglet - beiseina nei thar mah se goal dang erawh an nei thei lo a, 2-1 in an tlawm. Inelna thlengtu France hian Amel Majri-i ball cross-in Kelley O'Hara kut a per nia an hriat avangin penalty beisei mah se referee-in a pe lo a, replay ennawnin referee thutlukna a dik.

Europe-a football thuneitu sang ber UEFA chuan World Cup hi Olympics-a Europe aiawh tur hmeichhe team thlan nan a hmang nghal a, European hmeichhe team ti ṭha pathum chu tling tur an ni. 

Semifinal lut pathum England, Sweden leh Nether­lands te Japan thlen tur Olympics 2020-a hmeichhe football tan an tling nghal tihna a ni a, England hi Great Britain hmingin an tling. Olympics-a hmeichhe football-ah hian team 12 an inel dawn a, European club pathum bakah hian inelna thlengtu Japan, Copa America champion Brazil leh OFC Nations Cup champion New Zealand te chu tling chiang an ni. 

USA-in semifinal lut ve mah se UEFA hnuai an nih avangin Olympics atan tling sa an ni ve lo a, CONCACAF qualifier an la khel leh phawt ang.