Kerber hnehin Pliskova champion

Wimbledon inbuat­saihna tournament hnuhnung Eastbourne International chu Inrinni zan khan khelh zawh a ni a, world number 3 Karolina Pliskova chuan Angelique Kerber 6-1, 6-4 a hnehin a vawi hnih nan a champion.

Czech Republic nula hian German star laka hnehna chang tur hian darkar khat leh minute 11 hun a hmang, final-a a hneh hi Wimbledon champion lai a nih avangin vawiin aṭanga khelh ṭan tur grass court inelna lianah inrintawkna sang tak nen a inlan thei ang.

Kum 27 mi Pliskova chuan, "Kar tluanin ka khel ṭha em em a, chutihrualin match ṭhenkhat erawh kan point en aṭanga chhut ngawt theih a ni lo. A lan dan ang aia harsa pawh a awm nual," tiin a sawi. Mipa final lamah Taylor Fritz chuan Sam Querrey 6-3, 6-4 a hnehin a vawi khat nan a champion, kum 21 mi Fritz tan ATP title a lakna hmasa ber a ni nghal bawk.