Argentina hmabak Brazil

Lionel Messi awmna Argentina tan Copa America final luh a awlsam dawn lo, world champion vawi hnih ni tawh hian Nilaini zingah a thlengtu Brazil chu semifinal-ah an hmachhawn ang.

Copa America quarterfinal inkhel paliah Argentina chiah hi hun pangngaia hnehna chang thei an ni. Lionel Scaloni naute hian Inrinni zing khan Venezuela chu 2-0 in an hneh. Brazil, Chile leh Peru te chuan an khingpui ṭheuh goal awm loa an inhnehtawkpui hnuah penalty shootout hmangin hnehna an chang a ni.

Maracana Stadium, Rio de Janeiro-a inkhelah Sergio Aguero chuan goal khung lo mah se player langsar a ni. Manchester City striker ball pet na zet chu minute 10-na lekah tlarhma lama a tlan pui Lautaro Martinez chuan goalkeeper Wuilker Farinez dan hman lohin a khung.

Venezuela lamin defender Ronald Hernandez hmangin si phurh sut theihna hun nei mah se keeper Franco Armani a paltlang zo lo, hei bak hi goal zawna pet an nei thei tawh lo. Minute 74-naah Aguero thawhrah vang bawkin  Giovani Lo Celso-a'n Argentina chak nemnghehna a khung a ni.Argentina lamin goal khung belh theihna hun nei mah se Inter Milan striker Martinez a vannei nawn lo, keeper chauh a hmachhawn tawhah a hlah bakah substitute Angel di Maria-a shot ṭha zet chu Farinez-a'n a lo dansak.

Copa America final hnuhnung pahniha chak lo Argentina hian a zawna a vawi thum nan final luh an tum mek a, an hmachhawn leh tur hi tun tournament bika goal la chhuah lo Brazil an nih avangin a awlsam dawn lo.

Brazil coach Tite-a'n, "Argentina hi Messi awmna a nih avangin kan hlau ngawt lo, player pakhat ve mai a ni," tiin a sawi tawh. Beisei anga khel chhuak lo Messi tan world champion vawi nga ni tawh hmachhawn hi fiahna a ni dawn.

Argentina coach Scaloni chuan, "Messi chu Messi a ni, player dang zawng chunga awm a ni. Brazil nen kan inkhelh tur hi football ngainatu tan chuan a manhla khawp ang, a hautakin a harsa tawh dawn, football mawi tak lantir chungin hnehna chan kan tum ang," a ti.

Manchester United forward Alexis Sanchez chuan chakna goal khungin Chile chu Copa America semifinal a hruai thleng leh ta, champion lai hian goal khung loin Colombia an inhnehtawkpui hnuin penalty shootout-ah 5-4 in an hneh.

Corinthians Arena-a inkhelah Chile an vanduai dawn niin a lang hman. Midfielder Charles Aranguiz leh Arturo Vidal te goal khung chu video assistant referee (VAR) hman a nih hnuah hnawlsak an ni. Penalty erawh pet lut vekin, Colombia tan defender William Tesillo chuan a hlah thung.

Barcelona midfielder Vidal chuan, "Team ṭha tak hmachhawn chungin inkhel kan thunun tluan chuak thei. Kan goal khung pahnih VAR vanga pawm a ni lo kha a pawiin a uiawm hle, hun pangngaiah khan chak phu khawpin kan khel," tiin hnehna chan phu zawk an nih thu a sawi.

Colombia coach Carlos Queiroz chuan, "Penalty hi chu player aiin Pathian kutah a innghat thui tawh zawk a, football-in a ken tel a nih avangin kan inkhelh chhung chuan kan la tawng zel ang," a ti. Colombia hi group match-a chak vek awmchhun an ni a, knockout stage-ah erawh beisei an phak lo.

Penalty pettu player 10 zingah Luis Suarez chauhin a hlah avangin Uruguay chu Peru lakah 5-4 in an chak lo a, Copa America champion hnem ber hi an zinkawng tawpin Rio aṭangin an ram lamah an thlawk haw thei.

Barcelona striker Suarez hian hun pangngaiah goal khung mah se offside vanga pawm a ni lo, penalty shootout-ah rawn ding chhuak hmasa leh berin a hlah bawk. Peru tan Edison Flores chuan chakna goal a khung.

Uruguay an vannei tawk lo, Suarez bakah Edinson Cavani goal khung pawh pawm a ni lo - goal khung tuma target zawna vawi 12 zet an pet chu a hlawhtling lo vek. Cavani leh captain Diego Godin ten yard ruk vel leka hla aṭangin an chhuih over bawk. Peru erawhin goal zawnah vawi khat chiah an pet thei.

Group A pathumna ni chunga quarterfinal lut Peru hian semifinal-ah chuan champion lai Chile an hmachhawn dawn. Copa America final hi July 8, Thawhṭanni zing hian Maracana Stadium, Rio de Janeiro-ah khelh tur a ni ang.

Venezuela    0 - 2    Argentina

ARG : Lautaro Martinez 10'; Giovani Lo Celso 74'

Colombia    0 - 0    Chile

(Penalty shootout-ah Chile 5-4 in an chak)

Uruguay    0 - 0    Peru

(Penalty shootout-ah Peru 5-4 in an chak)

July 3, Nilaini

Brazil    06:00 AM    Argentina

July 4, Ningani

Chile    06:00 AM    Peru