United-ah Bissaka a lut fel ta

Manchester United chuan England Under-21 right-back Aaron Wan-Bissaka chu Crystal Palace aṭangin an la fel ta. He player manah hian pound maktaduai 50 thleng pe thei turin an inrem. 

United hian pound maktaduai 45 an pe phawt a, pound maktaduai nga dang hi chu a khelh ṭhat dan azira la pek leh tur a ni. Wan-Bissaka aia United player man to chu Paul Pogba, Romelu Lukaku, Angel di Maria leh Fred-te chiah an ni.

February 2018-a Palace tana a match hmasa ber khel ve chauh defender hian Old Trafford-ah kum nga chhung khel turin contract a ziak a, kar khatah £80,000 a hlawh dawn. Kum 21 mi defender hian Palace-ah khan kar khatah £10,000 a hlawh a, first team player zinga hlawh tlem ber a ni - tunah erawh United tan a khel tawh dawn a, Palace player zingah a hlawh ang zat hlawh phak chu an tlem pharh ang!

Wan-Bissaka chuan, "Ka tan chuan thil awihawm loh tak ang mai a ni a, chawimawina ropui tak a ni," a ti a, a phur hle - United hi pound maktaduai 50 aia toa a chhuahsan leh a nih chuan Palace-in a hralhna man 10% an hlep ve dawn. 

Red Devils manager Ole Gunnar Solskjaer chuan, "Premier League-a defender ṭhangduang ber pawl a ni. A thawkrim a, talent a nei a, Manchester United tana khel tur khawpin a rilru put hmang a dik bawk. "United-in hma kan sawn zel theihna atana min pui tura kan duh ang tak player a ni," tiin a defender thar chu a fak hle. 

United hian striker Marcus Rashford chu contract thar an zawrh mek bawk a, an inrem vat beisei a ni. Kum 21 mi striker contract hi 2020-ah a tawp tawh dawn a, United hian hun rei zawk atan chelh an duh - kar khata £80,000 hlawh mektu hian hlawh tam zawk a phut.