Vawiin aṭangin CYMA Football khel ṭan dawn
Suzuki Gixxer SF 250 Inter Branch YMA Football Tournament chu June 28, Zirtawpni zan khan CYMA Hall-ah minister of state Lalruatkima'n khuh hawnna a nei a, vawiin aṭangin khelmual pali - Lammual, RG Stadium, Republic Veng Khelmual leh Ramhlun Sports Complex-ah khelh a ni ang.
CYMA Football vawi 20-naah hian team 110 an tel a, group paliah ṭhendarh a ni. Tun ṭum inelnaah hian last 16 aṭangin fixtures hi pawh ṭhat leh tur a nih avangin group pakhat zel hi hlawm li angah ngaih theih a ni a, hlawm khat aṭangin pakhat zelin last 16 an lut ang.
Tun ṭum inelnaah hian fairplay, top scorer leh best player an thlang dawn a, heng chawimawinate hi last 16 lut pha chin aṭanga thlan tur a ni. Team tel zawng zawngte hnenah ngaihhruina thilpek pek vek an ni dawn bawk.
Last of 16 aṭangin Lammualah khelh a ni dawn. CYMA Football 2017-a last 16 lut Aizawl Venglai, Bawngkawn, Chaltlang, Chanmari, Chhinga Veng, College Veng, Durtlang, Hualngohmun, ITI Veng, Leitan, Lengpui, Republic Veng, Salem Veng leh Zawl-nuam Borai te chu seeded an ni.
Champion lai Ramhlun South leh Republic Vengthlang te an tel loh avangin Aizawl khaw pawn aṭanga team ṭha tura ngaih Khawzawl Joint YMA leh Hnahthial Joint YMA te chu seeded-ah dah an ni. Team ṭha ber pawla ngaih leh champion ngun ber Armed Veng chu inelna hnuhnung berah last 16 an lut lo a, tun ṭumah hian seeded an ni lo.
Vawi nga champion tawh Armed Veng hi seeded team College Veng awm tinuam lotu an ni thei ang. Chutiang bawkin team ṭha tura ngaih Chanmari West, Bethlehem Vengthlang, Armed Veng South leh Venghlui te seeded an ni pha lo a, seeded team zingah last 16 lut pha lo an awm ngei turah a ngaih theih.
Vawiin Inkhel Tur
Group A - RG Stadium, Mualpui
Kolasib Venglai 2:00 PM Zemabawk North
Group B - Ramhlun Sports Complex
Thenzawl Joint 2:00 PM Dawrpui Vengthar
Group C - Republic Veng Khelmual
Chiahpui 12:00 PM Tuithiang
West Phaileng 2:00 Pm Samtlang
Group D - Lammual
Sesih 12:00 PM Venghnuai
Dengsur 2:00 PM Tuivamit