MPL club pariatin player 206 ziaklut

Mizoram Football Association hnuaia player inziahluh hun chu June 29, Inrinni khan khar a ni a, MPL club pariatin player 206 an ziaklut.

Champion lai Aizawl FC chuan player 27 ziaklutin foreigner pahnih Alfred Kemah Jaryan leh Juuko Richard Kassaga te an ziak lut tel. Mizoram Police-in player 30 ziaklutin player an ngah ber, Chanmari FC (24), Chawnpui FC (23), Electric Veng FC (22), Ramhlun North (29), Chhinga Veng (29) leh MPL club thar FC Venghnuai (25) ten player 20 aia tam an ziak lut vek bawk.

Electric Veng FC-in MPL best defender nilai PC Laldinpuia an lakluh thu Vanglainiah tarlan a ni a, Samthang tlangval hi MFA-in team list a pholanah a awm lo.

Vanglaini chuan hemi chungchang hi a zir chiang nghal a, a chhan nia lang chu MFA-in kumin aṭanga MPL-ah AIFF software Centralized Registration System (CRS) hman a tum vang a ni. CRS hi Indian Super League, I League, I League 2nd Division, Santosh Trophy leh AIFF hnuai kum bithliah inelnaah hman a ni tawh a, he ta inziaklut player hi chu software hmangin an awmna club a hriat zel theih.

Season liam ta khan Dinpuia hi Chhinga Veng FC tan a khel a, I League Second Division a khelh ṭhat avangin Kolkata club Southern Samity aṭangin sawmna a hmu. Sawmna hi a pawm hman avangin MFA leh Chhinga Vengin chhuah phalna an pe a, an khelh tumna Southern Samity-a khel turin CRS-ah a hming a lang.

Dinpuia hian MPL khelh a duh leh tak avangin Southern Samity hi a zawm ta lo a, contract an ziak ta lo. Amaherawhchu, CRS-ah ah a hming a lan tho avangin MFA registration committee-in an ziaklut hrih lo a, ani bik hi a chungchang an ngaihtuah ang - CRS-ah Southern Samity lamin an rawn chhuah (release) zet a ngai ang.

AIFF-in thuchhuah a siam tawh angin an hnuai leh an state association hnuaia inziaklut player-te an hriatpui loh inelnaah tel an phalsak lo. MFA hian tun hmain hmun danga khelte an ngaidam a, khel nawn lo turin an hrilh a, chumi hnua hmun danga inkhelte chu an hrem - chutiang zingah chuan Venghnuai FC player Peter Lalrinhlua pawh telin MPL ah a inlan thei dawn lo.

MPL inziaklut zinga upa ber chu Mizoram Police player Lalbiaknunga a ni a, July 23, 1983-ah a piang. Kum 1984 leh 1985-a piang pawh pakhat ve ve chauh awmin Police player Lalfakawma leh Lalsangbera te an ni.

Player 206 zinga naupang ber chu Lalhruaizela a ni a, Chanmari FC tana inziaklut N.Lungleng rawlthar hi  July 15, 2004-ah a piang. MPL8-ah hian kum 2000 leh a hnu lama piang player 72 an awm a, kum 1996-1999 a piang 71 an awm a, kum 1991-1995 a piang 48 an awm.

Tun ṭumah hian foreigner pahnih, state pawn pahnih, Aizawl khaw pawn 109 leh Aizawl khaw chhung 97 an awm a ni. State pawn player leh foreigner-te bik hi chu AIFF transfer window a tawp hma chu ziah luh belh theih an la ni.