Mizo club hmaah Mohammedan

Aizawl FC chuan vawiin tlai dar 2:00 hian Salt Lake Stadium-ah Mohammedan SC an hmachhawn dawn. I League khelh mekah Mizo club hi pasarihnaah an awm mek a, parukna chinin champion tur an zawn dawn avangin AFC tan Mohammedan hi an hneh ngei a ṭul.

AFC coach Yan Law chuan, "Kan player thar Abhishek Rijal hi khung hran a la ngaih avangin a la inlan thei dawn lo. Richard Kassaga hi hliam vangin chhawr theih a ni lo bawk," tiin Nepal international forward Abhishek Rijal-a'n a club hlui Mohammedan SC a la hmachhawn loh tur thu a sawi.

Mizo club hian match hnuhnung pahniha Trau leh Sudeva Delhi an hmachhawn ṭum aṭangin point khat chauh an hlawh chhuak a, penalty vawi khat ve ve an hlah. Penalty hi khung ve ve se point li hmu thei an ni a, point thum an hlohah a ngaih theih.

Yan Law chuan, "Sudeva nen point thum kan hmu lo kha pawi kan ti a, chutihrualin kan hnual phah lo. Beiseina sang tak nei a, insiamṭhat zel kan tum. Mohammedan hi team ṭha tak an ni chungin hneh ngei kan tum dawn a ni," tiin a sawi.

Mohammedan SC-ah hian Hriangtlang tlangval Vanlalbiaa Chhangte a khel a, Mizo player hian a naupan laia a khelh tawhna club Aizawl FC hi I League-ah a hmachhawn dawn a, an inkhelhna tur hmun hi Salt Lake a nih bawk avangin vawiin an inkhel tur hi a ngai pawimawh khawp ang.