Nike leh Remsiami thawkdun

Mizo tleirawl hockey khel thiam Lalremsiami Hmar leh Nike te chuan inremna an nei. American thuamhnaw siamtu company lian hian Remsiami mamawh an tumsak tawh dawn tihna a ni.

Youth Olymic silver medalist Remsiami chuan, "Inremna kan nei thei hi a lawmawm, ka mamawh zawng chu ka awmna hmunah Nike hian min rawn pe ṭhin dawn a ni," tiin Vanglaini a hrilh. Social media-ah post a siamin Nike hi a 'tag' ṭhin dawn a, company dang hak a rem lo ang.

Hockey player tan company lian nena inremna neih hi thil awlsam a ni lo. Rani Rampal chu India hmeichhe player zingah Nike nena inremna nei hmasa ber a ni a, Mizo nula hi pahnihna dinhmun luahtu a ni - Tokyo Olympic an khelh zawh hnuah inremna duhawm zawk a awm theih a beiseiawm bawk.

FIH Rising Star of the Year pawh lo ni tawh Remsiami hi IOS Sports & Entertainment chuan inremna an nei pui tawh bawk a, India ram chhunga infiammi langsar leh hmabak nei engte vawrh lar ṭhintu hian a chanchin chu khawvel hriatah an puanzarsak ṭhin dawn.

IOS hian Mizo wightlifter Jeremy Lalrinnunga pawh inremna an neihpui tawh a, Govt. Complex rawlthar hi thuamhnaw lamah chuan Adidas nen an thawkdun mek thung.