Champions League-ah Liverpool an danglam

Premier League match thum zet a zawna an tlawm hnuah Liverpool dik tak kan hmu leh ta a, English champion hian an thiam an la theihnghilh lo tih pholangin Champions League last 16 first leg-ah RB Leipzig chu 2-0 in an hneh. 

Liverpool tan Mohamed Salah leh Sadio Mane-ten goal khat ve ve an khung a, Leipzig lamin a chhanletna tur an nei lo - Anfield-a inkhel leh tur an nih avangin Reds tan quarterfinal lut turin hna a awlsam tawh ang. 

Reds boss Jurgen Klopp chuan, "Kan dinhmun an thlirin mi tam takin tlu leh turah min ngai a, mahse ka naute erawhin ngaihdan dang an nei thung - chu chuan minti hlim em em a ni," tiin a sawi. 

Hungary-a inkhel hi Liverpool fans tan chuan lawmna tur hlir a ni a, season hmasa lawka Premier League thununtu team ang khan an khelh leh tak avangin beiseina pawh a sang ang. 

December 9 khan Liverpool-in Champions League group stage-a an match hnuhnung ber an khel a, khualmualah Midtjylland inhnehtawkpuiin group hmahruaitu ni chungin last 16 an lut. 

Hetihlai hian Premier League table-ah pahnihna an ni a, an chung chiaha awm Tottenham Hotspur an tluk lohna chu goal difference chauh a ni. FA Cup-ah third round lut tawhin beisei an la nei bawk. 

Mahse, Champions League last 16 khelh a hun meuh chuan Liverpool dinhmun a chhe tawh hle - league nomawi an thlauh tawh angin sawi theih a ni a, FA Cup aṭangin petchhuah an ni tawh a, Leipzig lakah pawh beisei a sang lo. 

German club hi season hmasa semifinalist, tun season group stage aṭanga Manchester United pet chhuaktu, Bundesliga-a pahnihna ni mek an ni a, tun hnaia Liverpool 'form' ngaihtuahin tam takin an huphurhpui. 

Leipzig-in Covid-19 dan khirh tak avangin an khelmual hmanthiamah Liverpool an mikhual thei lo a, Hungary-a Puskas Arena-ah Reds an mikhual a ngai - English club tan chuan chanchin lawmawm a ni. 

Inkhel ṭan aṭanga minute ngana lekah German club-in Dani Olmo hmangin chance an nei nghal a, post an tih per - team pahnih an inhlau lo tawn a, an innawr tawn zak zak reng. 

Mahse, Liverpool-in chance an ngah zawk - Mane, Salah, Andy Robertson leh Roberto Firmino-ten hun ṭha an nei vek a, an hun ṭha neih goal-ah an chantir thei lo thung. 

Firmino hian first half-ah goal-a tauh lut niin inngai mah se Mane-a'n ball a petin a 'out' tawh a, pawmsak a ni lo. 

Second half ṭantirah Leipzig-in Christopher Nkunku hmangin chance duhawm an nei a, mahse, a match hnuhnung pahniha chesual Alisson-a'n world class keeper a nih chhan pholangin ṭha zetin a dang. 

Liverpool fan-te hlauthawngin an awm nawn tawh lo - Leipzig defender-te ball inpek sual nangchingin Salah chuan minute 53-naah goal hmahruai a khung a, tun season inelna hrang hrangah match 34 khelin goal 24-a khung tling leh der tawh. 

Minute nga a liam a, Liverpool bawkin goal an khung nawn - Leipzig tlarhnung chetsual zar bawk zoin Mane chuan Reds goal hnihna a khung a, chak tur a chiang.

Leipzig tan substitute Hwang Hee-chan-a'n hun pek belhah chance a nei ve leh tih loh chu sawi tur a awm tawh lo a, Salah leh Mane-a'n nipui transfer-a Bayern Munich pan tur Dayot Upamecano an chhaih kual dan kha German champion fan-ten an en a nih chuan an tui phah lutuk lo ang!

Hei ngei hi a ni kan mamawha kan duh em em chu. Leipzig hi team ṭha tak an ni a, tharum an ngahin an taima em em bawk si - mahse, zaninah erawh kan khum a ni. 

Kum hnih chhung chu football hmuhnawm tak kan khel tawh a, kuminah buaina chhe te kan nei. Hemi chungchang an sawi zui hi a awm lo hran lo a, mahse, zaninah erawh kan theihna kan pholang leh ta. 

Liverpool chuan an chance neih ṭhat pahnih goal-ah an chantir a, keinin chance ṭha vawi thum kan neihte kan khung thei lo thung - chu chu kan danglamna a ni. Kan tihsual pahnih vangin hrem kan ni a, hetiang ang game class sangah chuan a awm reng a ni. 

Kan chance neihte khung tur kan ni a, mahse, goal kan chhuah zawk miau si. Kan inkhelh hma khan Liverpool hian zah takin min en a, tunah chuan min dah sang lehzual sawtin ka ring.