Italy-ah Sociedad Vs Man United

Covid-19 vangin Real Sociedad-in an mualah Manchester United an mikhual thei dawn lo a, Spanish club hian Ole Gunnar Solskjaer-a hote hi zanin dar 11:25 hian Juventus Stadium-ah an hmachhawn ang.

Real Sociedad hi season ṭantirha an chet ṭhat avangin La Liga-ah hmahruaitu te an ni hman a, tunah erawh panganaah an awm tawh thung. Spanish club hi group stage-ah Napoli te nen an awmho a, Italian club hi tluk loin pahnihna niin knockout stage an lut.

Manchester United erawh Champions League aṭanga tla thla an ni a, an match hnuhnung pahniha PSG leh RB Leipzig an hneh loh avangin Europa League an khelh a ṭul phah. Solskjaer-a hote hian season liam ta khan Europa League semifinal an thleng tawh a, tun ṭumah hi chuan nomawi chawi ngei an tum tawh ang.

Sociedad leh Man United hi 2013-14 season khan Champions League group stage-ah an awm dun tawh a, Old Trafford-ah English club 1-0 in an chak a, Spain-ah goal awm loin an inhnehtawk.

Man United hian Europe-a Spanish club an hmachhawn hnuhnung pakuaah (D3, L6) chak an nei lo. Spanish club an hneh hnuhnun ber chu 2016-17 season daih tawh kha niin Europa League semifinal-ah Celta Vigo 1-0 in an hneh.

Record thlir letin English club tan Sociedad hi zuam ngawt a rem lo a, chu chauh ni loin Spanish club hian Manchester City legend David Silva, Man United chhul chhuak Adnan Januzaj bakah Spain international forward Mikel Oyarzabal leh Sweden international forward Alexander Isak te an kawl. Spanish club hian Man United hneh theihna tur squad an nei a ni.

Belgian rawlthar Adnan Januzaj-a'n kum 2011 khan Man United youth team a zawm a, kum 16 mi lek niin first team tan a khel ṭan. David Moyes hnuaiah 2013-14 season khan player pawimawh a ni pha a, Belgium pawhin an chan loh hlauin World Cup 2014 squad-ah an dah hial.

Amaherawhchu Januzaj hian beisei a pha lo a,  Louis van Gaal-a'n Belgian rawlthar chhawr aiin sum tam tak senga player lak a thlang. Kum 2016-a Jose Mourinho-a'n thuneihna a rawn chelh hnuah phei chuan Januzaj tan kawng a inhawng tawh lo. 

Portuguese manager hian Januzaj chu a jersey number 11 a chhuhsak a, Borussia Dortmund leh Sunderland-ah loan hmanga a khelh hnuin kum 2017 khan Real Sociedad hi a pan a ni.

Kum 26 mi Januzaj chuan, "Min ring ngamtu coach ka mamawh. Moyes-a'n club a chhuahsan hnu khan ka khelh tam loh avangin ka tan chuan harsa hle. Ka khel a, match ruk te bench-ah ka ṭhu leh a, ka insiamrem thei lo. Coach pathum Warren Joyce (reserve team coach), Sir Alex Ferguson leh Moyes te zarah ka club hmangaih tan ka khel thei a, a hnu lamah kha chuan a harsa tawh a ni," tiin a sawi.

Ole Gunnar Solskjaer-a awm hnuah rawlthar player-ten chance ṭha an ngah lehzual a, Thawhlehni khan kum 19 mi Mason Greenwood-a'n kum 2025 thleng atan contract a pawtsei a, kum khat danga pawhsei leh theih dan a awm bawk.

Greenwood hian first team tan match 82 khel tawhin goal 21 a khung tawh a, nikum September thla khan England tan pawh a inlan tawh. United hian Greenwood bakah hian rawlthar duhawm an nei nual a, tun hnaia hming langsar chu Amad Diallo leh Shola Shoretire te an ni.

Kum 18 mi Amad leh kum 17 mi Shoretire te hi Europa League hma hian first team zingah training an nei a, rawlthar pahnih Real Sociedad nen squad-a a awm thei dinhmunah an ding a, khelhna hmun an chang ang em tih erawh a la hriat loh thung.