Mourinho tan insiamṭhat a ngai

Tottenham chuan zanin dar 11:25 hian Austrian club Wolfsberger AC an hmachhawn dawn. Jose Mourinho hote hian an match hnuhnung parukah vawi nga an chak loh avangin insiamṭhat an mamawh a, khawtlang media phei chuan Portuguese manager thlakna tur an inrinsiak leh ṭan der tawh.

Jose Mourinho tan result ṭha neih ran a ṭul a, Europa League aṭanga a ṭan a ngai. Europe inelnaah hian Premier League lama chhawr tam tawk loh Gareth Bale, Dele Alli leh Carlos Vinícius te khelhna hun pek an ni ṭhin. Chutihrualin chak duh Mourinho hian Harry Kane leh Son Heung-min te a chhawr thei bawk.

Spurs manager Mourinho chuan, "Player theihna nei sang chu a fitness a ṭha a nih chuan team tan an ṭangkai ṭhin. Chuvangin Bale hi a fit ṭha a nih chuan lawm takin team tan ka khelhtir ang," tiin a sawi.