Suns lakah Nets an tho chhuak
Nimin zing khan James Harden-a'n point 30 a neih bakah assist vawi 11 nei bawkin, a club Brooklyn Nets chu Phoenix Suns lakah 128-124 in hnehna a chanpui - Eastern Conference table lamah pahnihna dinhmun an luah ta.
Suns lamin bul an ṭan fuh a, quarter hmasa pahnih an khelh zawh chuan point 21 zetin an sang fal hman a, harsa lutuk loin an chak tlang mai dawn niin a lang hman; point neih belh aiin a venhim lam an ngai pawimawh zui bawk.
Harden awmna Nets lamin inkhel chawhnu lamah na takin an bei let a, quarter hnuhnung ber bikah phei chuan point 40 zet an neih laiin Suns lamin point 24 bak an nei thei lo, inkhel a zawh meuh chuan point liin an lehthal.
Inkhel dangah champion lai Los Angeles Lakers chuan Minnesota Timberwolves lakah 112-104 in hnehna an chang. Lakers hian an player pawimawh Anthony Davis chu hliam vangin an chhawr thei lo a, point 30 nei thei LeBron James an neih avangin buaina erawh an tawk lo.
NBA Results
Brooklyn Nets 128 - 124 Phoenix Suns
Boston Celtics 112 - 99 Denver Nuggets
Los Angeles Lakers 112 - 104 Minnesota Timberwolves
New Orleans Pelicans 144 - 113 Memphis Grizzlies
Toronto Raptors 124 - 113 Milwaukee Bucks
Portland Trail Blazers 115 - 104 Oklahoma City Thunder