Du Plessis-a'n Test cricket a chawl

South Africa captain hlui Faf du Plessis chuan nimin khan Test cricket a chawlhsan thu a puang a, Twenty20-ah a insawrbing ang.

Kum 36 mi Du Plessis hian kum 2012 aṭang khan Test match a khel ṭan a, match 69 a khelh ṭangin 4,163 runs a siam a, a average hi 40.02 a ni pha a ni.

Du Plessis chuan, "Kum hnih chhungin ICC T20 World Cup ṭum hnih a awm dawn a, hemi a nih avang hian T20-ah hian rilru zawng zawng sen kan duh. Test cricket chawlhsan turin thutlukna ka siam fel," tiin a sawi.

Kumin October-November thla chhung hian India-in T20 World Cup a thleng dawn a, nakkum October-November thla khian Austrlia-in a thleng leh bawk dawn. Kum hnih chhungin T20 World Cup vawi hnih khelh a ni ang.

Proteas batsman Du Plesis hian Test century vawi 10 a siam a, ram tana khelh hmasak berah century a siam nghe nghe. Nikum December thla khan Sri Lanka nen run 199 a siam a, a record neih ṭhat ber ṭum ni mah se tun thlaa Pakistan 2-0 a an hneh loh ṭumin innings vawi liah run 55 chauh a siam.

Du Plesis chuan, "Kum 15 liam ta khan tu emawin South Africa tan Test match vawi 69 i khel ang a, i captain-na hnuaiah an la khel ang, ti ta se ka awih lo ang," tiin a thlen china a lungawi thu a sawi.