Rooney enkawl Derby an che ṭha

Injury time-a Andre Wisdom goal khung hmangin Derby County-in Thawhlehni zan Championship inkhelah anmahni ang bawka thla thei dinhmuna ding Wycombe Wanderers 2-1 in an hneh.

Wayne Rooney kaihhruai Derby hian match hnuhnung paruk aṭangin vawi nga an chak a, relegation zone chhuahsanin table-ah 16-naah an awm tawh.

Adams Park-a inkhelah hian Wycombe player Uche Ikpeazu-a'n minute 16-naah an lamah a ti lut a, Derby-in 1-0 in hma an hruai. Amaherawchhu Wycombe forward Ikpeazu hian a chetsual thup nan minute 48-naah penalty aṭangin siphurh a sut. 

A tawpah Derby an vannei a, injury time minute linaah Andre Wisdom-a'n league-a a goal hmasa ber a khung. Kum 27 mi Wisdom hian a inzir chhuahna Liverpool bakah West Bromwich Albion, Norwich City leh Red Bull Salzburg tan te a khel tawh a, tun ṭum hi league-a a goal khung hmasa ber a ni.

Derby County boss Wayne Rooney chuan, "Point thum kan hmuh avangin ka lawm a, kan khelh dangah erawh kan lungawi lo. Kan theihna angin kan khel chhuak lo a, tun aia ṭha khel thei tur a ni," tiin a sawi.

Championship inkhel dangah Watford-in Preston North End 1-0 in an hneh a, table-ah pathumnaah an inhlangkai. Nizan khan pakhatna Norwich City-in Coventry an tlawh a, pahnihna Brentford-in Queens Park Rangers hmachhawn bawkin result kan hre hman lo.