Mikhual ralṭitna Etihad Stadium-ah Arsenal

Manchester City an tawlhthluk laiin Liverpool an famkim bik lo a, Premier League boruak sang mek karah Pep Guardiola nauten Pathianni zan dar 10:00 hian Arsenal lakah fiahna an hmachhawn zui dawn.

Unai Emery enkawl Arsenal hi palina nih ngei tuma thapui thawh lai an ni a, Chelsea chak loh kara palina ni mek an ni. An chesual zauh a nih chuan an hnuaia awm Chelsea leh Manchester United ten an tlanpel nghal thei, an dinhmun a him lo hle.

Manchester City erawh 2001 hnu lama EPL nomawi a zawna chawi thei hmasa ber nih tum an ni thung. Chutih rualin point an hloh chuan Reds laka lallukhum hloh thei reng an ni - team pahnih dinhmun inang lo viau mah se, mamawh inang an neih chu point thum a ni.

Man City leh Arsenal te hi Premier League bikah vawi 43 an inhmachhawn tawh, record nei ṭha zawk Arsenal-in vawi 23 hnehna an chan tawh laiin ṭum 10 an tlawm thung, vawi 10 dang erawh an inhnehtawk thung.

Arab sum hmanga Man City an insiam len hnuah erawh Gunners hi inchhuang thei an ni bik lo. League match an khelh hnuhnung pathumah Guardiola naute an chak vek a, tun season match hmasa ber khan Emirates Stadium-ah Raheem Sterling leh Bernardo Silva te goal hmangin 2-0 in an luhchhuah hial.

Kum 1937 April thla hnu lamah Man City hian a zawnin Arsenal hi vawi li an la hneh ngai lo, kum 82 chhung an tih theih loh tawh hi Spanish manager kaihhruaina hnuaiah hian an ti thei ang em tih chu a hriat dawn a ni.

Premier League club ho stadium zinga a len lama palina Etihad Stadium hi mikhual team tan hmun ralṭi a ni, point thum hlawhchhuah chu sawi loh goal khat khung ringawt pawh a awlsam lo - mipui 55,097 lenna khelmualah Citizens ṭantute an khat leh dawn.

January 3 zan khan Liverpool forward Roberto Firmino-a'n City khelmualah hian goal a khung, a hnu lamah erawh inelna hrang hrangah mikhual team-in goal an la khung leh rih lo; mualneitu lam erawhin match li an khelh chinah hnehna chang vekin goal 24 zet an khung.

EPL season kal laia goal 15 khung tawh Pierre-Emerick Aubameyang leh Alexandre Lacazette (9 Goals) te hi striker inkawp fuh berte zinga mi an ni mek a, anni pahnih hi an khelh fuh ni a nih chuan City tlarhnung phui tak su hawng thei turin theihna an nei, chutih rualin an hna tur hi a awlsam dawn lo.

Arsenal-in goal khung an thei tih chu hmuh theihin a awm zel, thup theih miah loh erawh an tlarhnung pawp hi a ni. Defender Rob Holding leh Hector Bellerin te tan hliam vangin season a tawp tawh; Sokratis Papastathopoulos pawh tun thla tawp lama rawn kir tura beisei a ni.

Spain international Bellerin thlak thei tur Ainsley Maitland-Niles dinhmun a chiang lo a, kum 35 mi Stephan Lichtsteiner tan Man City forward che rang Leroy Sane emaw Raheem Sterling ven chu hna awlsam a ni dawn lo.

Thu lawmawm erawh Manchester United nen an inkhelh ṭuma hliam tuar captain Laurent Koscielny a dam tawh. France international hi a awm a nih chuan player naupang leh tawnhriat nei tlem zawkte ho khawm tumin a mawhphurhna a sang leh hle ang.

Premier League bakah Champions League, FA Cup leh League Cup an la beisei vek avangin Manchetser City hian match an khelh hnem a ngai a, tun thleng chuang an squad a chhah avangin buaina liantham an la tawk lo niin a ngaih theih.

Mahse, match hnuhnung berah Newcastle laka hma an hruai hnuin an tlawm, Citizens hi an chau nge player siksawi fuh tawk lo tih chu zawhna lian tak a ni. Spanish manager hian a tih dan phung pangngai angin a naute a siksawi chhunzawm tho a rinawm.

Benjamin Mendy hliam dam tawh mah se a inlan ala rinawm loh, goalkeeper Ederson-a'n hliam tenau nei mah se Gunners a hmachhawn theih a rinawm a, Kevin De Bruyne leh David Silva ten mifield lailum an luah a nih chuan Arsenal a hmachhawn vawi 11 zinga ṭum sarih goal khung thei Sergio Aguero a hlauhawm zual phah ngei ang.