Mizoram Police-in Last 16 an lut

67th BN Mullick Memorial All India Police Football Championship chu January 28 aṭang khan Malappuram, Kerala-ah khelh ṭan a ni a, Mizoram Police chu Madhya Pradesh, Assam Rifles, Gujarat leh Rajasthan nen group khatah awmin last 16 an lut. Nizan khan group match hnuhnung berah anmahni ang bawka la chak vek Assam Rifles nen an inkhel a, result kan hre hman lo.

Mizoram hian match thum an khel tawh a, Rajasthan 9-0 a sawpin bul an ṭan a, Gujarat leh Madhya Pradesh chungah pawh zahngaihna lantir loin 14-0 leh 10-0 in an sawp zui a, goal 33 khung tawhin goal an la chhuah lo.

Police Meet-ah hian team 32 an tel a, group riatah ṭhen an ni a, a sang pahnih ṭheuhin last 16 an lut dawn a, Mizoram hian tun ṭumah hian a vawi khat nan champion tumin an player neih ṭhat ber nen an thawk chhuak.