Leicester hi khelh an har dawn - United boss

Manchester United manager lailawk Ole Gunnar Solskjaer chuan Pathianni zan dar 7:35-a an hmachhawn tur Leicester City chu khelhpui an har tur thu a sawi a, King Power Stadium a nih dawn avangin a enkawlna hnuaia an chak lohna hmasa ber a nih pawhin a mak lo ang.

Foxes hian an match hnuhnung berah Premier League hmahruaitu Liverpool chu Anfield-ah an chelh thei a, December thla khan match zawnin Chelsea leh champion lai Manchester City te an hneh bawk. Heng result hi vannei a ni lo tih nemnghettu chu League Cup quarterfinal-ah pawh Pep Guardiola hote hi an chelh thei a, United tan chetsual theihna an ni.

Norwegian manager Solskjaer chuan, "Liverpool nena an inkhel kha ka en a, thahrui an ngah bakah an rang bawk. Goal venhim an thiam a, a kaw tawpah an inrem tam avangin pal tlang an har dawn. Chutihrualin khingpuite vaw let thei turin player tlan chak Jamie Vardy, Demarai Gray, James Maddison leh Marc Albrighton te an kawl. Foxes hmachhawn hi chona lian tak a ni a, chona hmachhawn hi kan châk zawk tak a ni," tiin point thum hlawhchhuah harsat tur thu a sawi.

United hian Solskjaer hnuaiah match riat an chak zawn hnuah Burnley FC nen 2-2 in an inhnehtawk a, eng ang chiaha tlo nge an ni tih fiahin a awm chho mek. January transfer United-in player lakluh an nei lo a, amaherawhchu an player pawimawh Anthony Martial chu July 2024 thleng atan contract an pawtsei.

Hetihlai hian Ashley Young, Juan Mata leh Ander Herrera te erawh tun nipuiah an contract a tawp dawn a, pawhsei sak an la ni lo. Keeper David de Gea erawh a contract-a an ziah tel sa angin tun season khan kum 2020 thleng an pawtsei tawh a, Spanish keeper hi hei aia rei chamtir an duh ang.

Belgian midfielder Marouane Fellani chu Chinese club Shandong Luneng nen inbe fel tawh nia sawi awm mah se nemngheh a la nih loh avangin Solskjaer hian a midfielder chungchang a sawi thui duh lo.