Foxes leh Monaco ten player inhawh thleng

Leicester City chuan AS Monaco midfielder Youri Tielemans chu tun season tawp thleng cham turin loan-in an lalut a, hetihlai hian Portuguese midfielder Adrien Silva an kawl lai chu French Ligue 1 club-ah hian loan thoin an kal tir ve thung.

Kum 21 mi Tielemans hian 2017 khan Anderlecht aṭangin Monaco hi a zawm a, tun season Ligue 1 match 20 a khelh aṭangin goal nga a khung tawh. A kum la tam lo mah se player beiseiawm tak a ni a, 2018 World Cup-ah pawh khan Belgium tan a inlan phak.

Ram tana match 14 khel tawh Tielemans chuan, "Premier League hi khawvela league ropui berte zinga mi niin, ka naupan lai aṭanga hmuhnawm ti taka ka en ṭhin kha a taka ka khel ve thei tur hi ka lawm," tiin a sawi.

Leicester aṭanga Mona-co pantu Silva hian 2017 khan Sporting Lisbon aṭangin King Power Stadium a pan a, mahse second 14 lekin an ziah fel tur an tih fel hman loh avangin thla ruk chhung chu English club tan hian a inlan thei lo.

Pound maktaduai 22 man midfielder hi a inlan theih chinah pawh beisei a phak lo, inelna hrang hrangah match 21 khelin goal a khung sak hman lo a ni.