Aizawl FC-in I League champion lai hneh
Nimin khan Aizawl FC chuan I League champion lai Minerva Punjab chu Lalrinchhana goal hmangin 1-0 in an hneh. Mizo club hian point thum hlu tak an hlawhchhuah avangin 10-na aṭangin pariatnaah an chho a, an chung chiaha awm Minerva Punjab nen point 14 ve ve an hmu bawk.
Tau Devi Lal Stadium-a inkhelhah hian first half-ah inkhel a nung tawk lo a, goal hmuh tur a awm lo pawh hi a mak lo. Minute 69-naah ding lam aṭangin
substitute Isak Vanlalruatfela cross chu Lalrinchhana'n a tauh lut a, inkhela goal awmchhun a ni.
Minerva Punjab khelmual a ṭhat tawk loh avangin inkhel a nung thei lo a, champion lai hian Aizawl FC champion puitu Mahmoud Al Amna la tharin second half-ah luhtir mah se inkhel a thlak danglam thei lo.
Aizawl FC-in coach thar Standly Rosario hnuaiah match thum an khel ta a, point li an hlawhchhuah avangin an relegate a rinawm lo a, table-a dinhmun sang zawka awm an tum ang.
Mizo club hian February 10 hian Gokulam Kerala chu an luhchilh dawn a, Mohun Bagan nen February 16-ah RG Stadium, Mualpuiah an inkhel ang.
Nimin I League inkhel dangah Neroca chuan Indian Arrows lehthalin 3-2 in hnehna an chang a, Manuel Retamero ho Manipur club hian point 25 hmuin table-ah panganaah an awm.
AFC U 18 che tha
Kum 18 hnuai lam inelna, Hero Elite League-ah pawh Aizawl FC Under 18 team ten nimin khan hnehna an chang a, group match hnuhnung berah Salgaocar chu R. Lalthanmawia goal hnih bakah Lalchungnunga leh Sangdingliana te goal hmangin 4-0 in an sawp.
Inkhel dangah Real Kashmir-in Mohun Bagan 1-0 a an hneh ve chiah avangin team pathumin point ruk an hmu a, goal difference nei ṭha ber Aizawl FC chu group hmahruaitu niin quarterfinal an lut.
Goa-a inelna neih mekah hian coach H. Lalnunzira leh Nicky Malsawmtluanga te enkawl Aizawl FC Under 18 hian Pathianni tlaiah group A pahnihna Chennaiyin FC Under 18 nen semifinal luh an inchuh ang.