Copa del Rey semifinal khel tur Real Madrid

Real Madrid chuan Copa del Rey quarterfinal second leg-ah Girona chu 3-1 in an hneh a, inkhel hmasa zawkah 4-2 a hnehna an lo chan tawh bawk avangin inkhel pahnih belhkhawmah 7-3 in an chak a, semifinal an lut. 

European champion tan Karim Benzema chu player langsar a ni a, French striker hian goal hnih a khung - Marcos Llorente chuan goal khat a thawh ve bawk a, Girona tana Pedro Porro goal khungin awmzia a nei lo. 

Real Madrid hma hian Valencia, Real Betis leh Barcelona te chuan an khingpui ṭheuh tlawmin semifinal an lo lut ve tawh bawk a, a thiam pali zingah Barca leh Real an tel avangin Copa del Rey a ngaihnawm sawt dawn tihna a ni.

Inkhel hmasa zawkah Real Madrid-in 4-2 in hnehna chang mah se Santiago Bernabeu-a inkhel an nih avangin goal hnih chhuah tel kher hi result ṭha a ni lo a, second leg-ah hian Girona hi si hnih faiin chak se chuan away goal rule hmangin an tlang daih thei!

Girona hian Cristhian Stuani an neih bawk avangin goal khung kawngah harsatna an nei tam lutuk lo tih a chiang bawk a, thil thleng thei thlirin Real hi an dinhmun a him bik lo anga sawi theih a ni - mahse Girona neih loh an nei tlat a, chu chu Benzema a ni. 

French striker hian minute 27-na lekah Real tan goal hmahruai a khung nghal a, minute 43-naah ven loa dah a nih man Girona ho hmuhtirin a goal hnihna a khung zui. Girona hian Pedro Porro hmangin minute 71-naah beiseina rawn insiam ve mah se rei erawh a daih lo a, minute nga hnu lawkah Llorente chuan khung ve lehin Real an chak chiang. 

Real Madrid hian Pathianni zan dar 1:15-ah league match an khel lehnghal dawn a, Alaves an mikhual ang. 

Zanin dar 11:00-ah Barcelona an inlan dawn a, an mikhual tur hi Valencia an ni. Barca hian La Liga table chung ber an la luah mek a, pathumna Atletico aiin point ngain an sang fal mek a, pathumna Real Madrid erawhin point sawm ngawtin an thlau tawh thung. 

Atletico hian Real Betis chu Pathianni zan dar 8:45-ah an lenchilh dawn a, champion tum tan chak loh chi a ni lo ang.