FA-in Beckham leh Salford pawm

English football-a thuneitu sang ber Football Association chuan David Beckham-a'n non league club Salford City-a 10% neitu nihna a lei chu an pawm sak a, English fifth division club-ah hian director dinhmun a chelh thei dawn tihna a ni. 

Salford hi Manchester United vanglaia 'Class of 92' zinga mi Gary Neville, Phil Neville, Ryan Giggs, Paul Scholes leh Nicky Butt ten neitu nihna an inṭawmna a ni a, he club-ah hian an vaia share neih belhkhawm chu 60% a tling ta chiah bawk. 

Hetihlai hian mimala he club-a share nei hnem ber erawh Singapore sumdawng hausa tawntaw Peter Lim a ni a, ani hian 40% neitu nihna Salford-ah hian a nei a ni. 

Kum 43 mi Beckham hian inkhelh a chawlhsan hnuah sumdawnna lamah a inhmang nasa a, kum 2020 aṭanga MLS khel ṭan tur Inter Miami-ah neitu zingah a tel bawk.

Salford hi National League-ah pahnihna an ni mek a, season thar aṭang chuan league puitlinga inhlan kai a, League Two khel turin an dinhmun a ṭha rih hle.