Lianzuala hmaah Blasters an thamral

Delhi Dynamos chuan tun season-a a vawi hnih nan hnehna an chang a, coach thar Nelo Vingada enkawlna hnuaia intuai thar tum Kerala Blasters chu 2-0 in an hneh - Mizo tlangval Lallianzuala Chhangte chu Hero of the Match atan thlan a ni. 

Delhi khawpuia inkhelah Gianni Zuiver-loon chuan minute 29-na lekah goal hmahruai a khung a, Delhi goal hnihnaah erawh Mizo pahnih hming a langsar - pakhatin red card a hmuh phah a, pakhatin penalty a hlawh chhuak thung!

ISL Emerging Player of the League ni lai, Blasters defender rinrawl Lalruatthara chuan penalty area-ah Dynamos chhuanvawr Lallianzuala Chhangte a ti tlu a, penalty a chawi a, red card a hmu zui bawk. 

Lunglei tlangval Lallianzuala penalty hlawhchhuah hi Rene Mihelic chuan goal-ah a chantir a, an goal hnihna an khung hian injury time a nih tawh avangin Blasters tan thawh leh ngaihna a awm tawh lo. 

Delhi tan hian Lianzuala bakah Daniel Lalhlimpuia chu bench aṭangin luhtir a ni a, Blasters lamah Lalthuammawia Ralte chuan bench lamah hun a hmang tluan thung.