Thlasik bazarah Premier League club an inren

Kum 2012 hnua a vawi khat nan January transfer-ah Premier League club sum hmanin kum hmasa lam a pha lo.

Transfer tawp niah pound maktaduai 50 vel lek thehchhuah niin thlasik bazarah pound maktaduai 180 hman a ni a. Nikum lamah erawh transfer tawp niah ringawt pawh pound maktaduai 150 hman a ni a, January bikah pound maktaduai 430 hman a ni thung.

Premier League hian ṭum dang pha lo mah se Europe league lian dang aiin an la hmang tam ber tho. Chelsea-in Borussia Dortmund aṭangin Christian Pulisic chu pound maktaduai 58-in an lalut a, American midfielder hian season tawp thleng loan-in German club tan a khelh chhunzawm dawn a, hei hian transfer thawm reh zia a pholang.

Newcastle United-in an player manto ber ni tura Miguel Almiron an lalut te chu transfer lian tham a ni leh a, amah-erawhchu Almiron thiamna hian ngaihven a hlawh pha lo. Chutihrualin ṭum dang zawng aiin loan an hmang ṭangkai a, Arsenal-in Denis Suarez an lalut leh Crystal Palace-in Chelsea striker Michy Batshuayi an hawh te erawh thawm lian thamah ngaih a ni thung.

English rawlthar duhawm Reece Oxford pawh Germany-ah intuai hriam chhunzawmin West Ham player hi Augsburg-ah loan in a kal a, Arsenal rawlthar Emile Smith-Rowe pawh RB Leipzig ah a kal ve bawk.

Tottenham chuan nipui leh thlalsik bazarah a zawnin player an lalut lo a; Liverpool, Manchester United, Everton leh Southampton ten player thar an nei lo bawk. January transfer nghawng lian tak erawh Emiliano Sala a ni a, Argentine forward hi Cardiff City-in an player manto ber ni turin Nantes aṭangin pound maktaduai 15-in an lalut a, amaherhawhchu thlawhtheihna chetsualna avangin January 21 khan English channel-ah a bo.

January transfer-ah Premier League club lian te an reh avangin sum hman a tam tawk lo a, chutihrualin 2018-19 season bika sum hman belhkhawm chu pound tluklehdingawn 1.4 a ni a, 2017-18 season-a sum hman zat pound tluklehdingawn 1.9 chiah a tluk lo. England ang thoin Spain, Germany, Italy, France leh Netherlands te transfer tawp hun chu January 31 a ni a, league lian dang zingah Portugal (2 February), Russia (22 February) leh China (28 February) club te erawhin player an lalut thei ang.