City player thar tur Palaversa

Manchester City chuan Croatian club ṭha Hajduk Split aṭangin midfielder Ante Palaversa chu pound maktaduai sarih bawr velin an lalut a, 2019-20 season tawp thleng loan-a khel turin an chhuahtir lehnghal.

Kum 18 mi midfielder ṭhangduang tak chuan, "Hadjuk tan ka theihna zawng zawng ka la pholang lo a, Manchester City-in min duh chhan tak pholan leh phawt hi ka duh a ni," a ti a, "Hmabak tam tak ka la nei a ni," a ti bawk. 

Palaversa hian July khan Hajduk Split tan a match hmasa ber a khel ve chauh a, City-in an lei meuh hi chuan match 15-ah inlan sak tawhin goal hnih a khung tawh. 

City hian rawlthar midfielder an lakluh hma hian an winger kum 18 mi Rabbi Matondo chu Schalke-ah an hralh a, Pound maktaduai 9.6 man hian German club tan kum li leh a chanve khel turin contract a ziak. 

Rabbi Matondo hian City under 21 tan match 11 khelin goal ruk a khung sak tawh a, Pep Guardiola enkawlna hnuaiah senior team zingah training a nei ṭhin bawk.