Magpies player manto ber Almiron

Newcastle United chuan an club transfer record thar siamin Miguel Almiron chu pound maktaduai 20-in an lalut a, Magpies fan-ten Manchester City an hneh hnu lawkah lawmna tur dang an nei nghal.

Kum 24 mi playmaker hi MLS club Atlanta United aṭanga an lakluh a ni a, Magpies player manto ber a nih rual hian MLS player hralhchhuah manto ber a ni tel nghal bawk. 

Almiron hian kum nga leh a chanve chhung atan contract a ziak a, kar khat a hlawh tur ringawt pawh hi £60,000 niin a khelh ṭhat dan a zirin bonus a la awm bawk ang.

Season hnih liam taa MLS team of the season-a lang thei ve ve playmaker hian kum 2005-a Michael Owen-a record lo awm tawh chu a khum a, Magpies hian Real Madrid aṭangin Owen hi pound maktaduai 16-in an lalut a ni - tun lai sum hlutna nena khaikhin erawh chuan Owen man hi a hun lai chuan a tam tham hle. 

Paraguay tana vawi 13 inlan tawh Almiron hian an ram club Cerro Porteno aṭanga a career ṭanin Argentina club Lanus-ah a kal leh a, 2016 khan Atlanta panin tunah chuan Premier League a khel dawn ta. 

MLS khelh zawh takah Almiron hian a vawi khat nan Atlanta hi nomawi a chawipui a, goal 13 a khung bakah assist vawi 11 neiin US-ah chuan player langsar ber pawl a ni. 

Newcastle hian nipui transfer lai khan Martin Dubravka, Ki Sung-yueng, Fabian Schar, Yoshinori Mutu leh Federico Fernandez te lakluh nan pound maktaduai 22 an seng ṭawk a, tunah player pakhat lei nana an insen dan ngaihtuahin lungawi lo nia sawi manager Rafael Benitez chelh an tum niin a lang.

Magpies hian Monaco defender Antonio Barreca chu season tawp thleng an hnena khel turin loan-in an lalut bawk a, an duh chuan season tawpah a nghetin an lalut thei dawn bawk.