Premier League-ah Crouchy a kir

Stoke City striker Peter Crouch chuan Burnley chu season tawp thleng khel turin a pan a, kum 38 a nih hnuah English striker pasang hian top flight football a khel leh dawn tihna a ni. 

Burnley hian an striker Sam Vokes chu Stoke City lamah hian an kaltir ve thung a, a man zat puanzar ni lo mah se Crouch hi an inremnaa tel a nih avanga Burnley pan a ni - Vokes hian kum thum leh a chanve chhung atan contract a ziak.

England international hlui Crouch chuan, "Ka kum a tam tawlh tawlh a, hlawhtlinna chhar duhin ka tuihal tawlh tawlh a ni," a ti a, a kum tam tawh mah se inkhel tura a la in fit ṭhat tawk reng thu a sawi bawk. 

Clarets boss Sean Dyche chuan, "Player entawn tlak tak a ni tih kan hria a, a la tuihal reng bawk. Kei chuan hetiang player enkawl hi ka nuam tihzawng tak a ni," tiin kum 38 mi striker an lakluh chhan a sawi. 

Crouch hian Premier League-ah Tottenham, Aston Villa, Southampton, Liverpool, Portsmouth leh Stoke City tan league match 462 khelin goal 108 a khung sak a, ram tan match 42-ah goal 22 a khung bawk.

Hetihlai hian Potters full-back Erik Pieters chuan Crouch ang bawkin Championship club hi a chhuahsan ve bawk a, French club Amiens chu season tawp thleng atan loan-in a zawm a ni.