Spurs vs Magpies Sum hmang lo hmaah record thar siamtu

English football transfer bazar a tawp a, zanin dar 6:00-ah team pahnih dinhmun in ang lo tak Tottenham Hotspur leh Newcastle United an inhmachhawn dawn. 

Spurs hian nipui transfer lai khan player thar an lalut miah lo a, thlasik transfer-ah pawh an lalut chuang lo - transfer window pahniha player thar lalut miah lo hmasa ber an ni a, hei hi stadium thar an sakna lama sum an insen nasat vang a ni.

Newcastle United erawh a neitupa Mike Ashley-a'n sum a ren avanga sawiselna a tawh reng hnuin thlasik transfer-ah an club record an thaichhia a, an player manto ber ni turin pound maktaduai 20 man Miguel Almiron an lalut. 

Newcastle United-in league match-ah Chelsea an ngam loh hnuin a zawnin match hnihah hnehna an chang leh tawh a, Cardiff City 3-0 a an sawp hnuin Manchester City chu 2-1 in an hneh bawk!

City meuh an hneh miau avangin Magpies hian inrintawkna sang tak an nei ang tih a chiang a, Spurs lakah hnehna chan theih an inbeisei ang. 

Hetihrual hian an player manto ber Almiron an la chhawr theih a rinawm loh a, Paraguay international hian visa a la tifel lo a, Wolves an hmachhawn hun aṭangin a inlan ṭan ve thei chiah ang. 

City hneh hlim Magpies an phur viau a ni mai thei a, mahse Wembley Stadium-a an lenluh hun tur hi Tottenham 'harh' lai tak a nih avangin an tan a harsa dawn. 

Tottenham hi League Cup leh FA Cup-ah hnehna chang zo loin kar hmasa chhung ringawt khan inelna pahnih aṭangin an tla fel der a, a hnua an league match hmasa berah erawh insiamṭha lehnghalin Watford chu 2-1 in an hneh. 

Spurs lawmna ti famkimtu tur chu Son Heung-min an nei leh ta hi a ni a, South Korean striker-in Aisan Cup a khelh hlanin match hnihah an tlawm a, a lo kir hnuah goal khung nghalin Watford an hneh!

Team pahnihin player inhliam an nei nual a, an ṭhat dan berin an khel dawn lo ve ve. Heivang hian chak lo zawk tan 'kim loh' chhuanlam a siam theih dawn lo a, point thum hmu zawk nih an tum khawp ang. 

Magpies hian hliam vangin Jonjo Shelvey, Joselu, Ki Sung-yueng leh Mo Diame an la chhawr theih hmel loh a, Yoshinori Muto chu Asian Cup khelin a la thang bo a, Spurs lamin an thiampuipa Harry Kane leh Dele Alli te an la inlan thei lo bawk. 

Spurs tan Kane-a hmun ruakah Watford laka chakna goal khungtu Fernando Llorente a pawimawh dawn tihna a ni a, Spanish striker hi goal khung turin an beisei ang.