Hazard + Higuain = Chelsea ṭha zawk

Chelsea-in Bournemouth laka 4-0 ngawta an mualpho hnuah insiamṭhain Inrinni zan khan Stamford Bridge-ah Huddersfield chu 5-0 in an sawp. Blues tan striker thar Gonzalo Higuain leh Eden Hazard ten goal hnih ve ve an khung hnuah David Luiz-a'n goal ngana a khung.

Chelsea boss Maurizio Sarri chuan Bournemouth laka mualpho player pali ngawt a thlak a, khel ṭha lo zinga hming langsar Higuain erawh Huddersfield hmachhawn turin a ring nawn. Italian manager hian Emerson Palmieri, Antonio Rudiger, Pedro leh Mateo Kovacic te aiah Marcos Alonso, Ross Barkley, Willian leh Andreas Christensen te a luhtir.

Brazilian defender David Luiz chu defence laiah rinrawl a ni a, Hazard pawhin ṭum dang ang thoin hmun pawimawh a chang. Cherries nen an inkhelh ṭumin Hazard leh Higuain te an inthlawp ṭha tawk lo a, tunah erawh an duh dan leh tum dan an inhre ṭha hle.

Sarri hian Napoli-ah Higuain a enkawl tawh a, Argentine forward hi mangan lakluh a ni lo. Chelsea-in an mualah an thiamna an pholang a, minute 16-naah N'Golo Kante ball pek chu offside trap bumin Real Madrid striker Higuain chuan vawi khatnaah a pet nghal pawp a, 'striker goal' tih theih turin goal hmahruai a khung.

Chelsea-in inkhel an thunun zawk a, goal erawh first half-ah injury time-ah lut leh chauhin Cesar Azpilicueta penalty hlawhchhuah chu Hazard-a'n a pet goal a, December 26 hnua league-a a pet goal lehna hmasa ber a ni.

Second half minute 66-naah Hazard-a class zia langin Ross Barkley pass chu Belgium international hian a ke dinglamin a la thla a, Terriers keeper Jonas Loss bum nan a ke vei lamin a la sawn leh a, angle zim tawh tak aṭangin a khung a, khelmual chhunga inkhelh thiam ber a nih zia pholang.

Minute thum hnuah Hazard bawk rawn langin a ball pek chu Kante-a'n Higuain tan a siam sak a, Argentine striker hian box pawn aṭangin a hlai goal. Chelsea-in goal liah an duh tawk lo a, minute 86-naah David Luiz-a ball tauh chu Elias Kachunga a per hnuah a goal, Terriers defender hian penalty a chawi tawh bawk.

Chelsea manager Maurizio Sarri chuan, "Higuain hian hma a sawn. Hazard nen hian an inkawp rem theiin ka hria, kan ṭhat pui ang. Higuain hian goal tam zawk min khung sak theih ka beisei a, Eden tan pawh a ṭangkai ang," tiin a player ṭha pahnih te khelh danah a lungawi hle.

Higuain hian Juventus aṭanga loan hmanga Chelsea a zawm hma hian loan thoin AC Milan a zawm a, hetah hian season chanve khelin league match 22-ah goal riat a khung. Amaherawhchu Sarri hnuaiah Higuain hian Napoli tan league-ah goal 36 a khung a, Serie A record a nih rual pha.

Italian manager hian Hazard-a'n a ṭhat dan berin a la khel lo tiin a sawisel a, tunah erawh kum 28 mi hian a pu lawmna khawpin a khel chhuak. Sarri chuan, "Lawmna tur hlir a ni a, goal nawr chauh ni loin goal venhim pawh a lungawi thlak hle. Minute 90 chhung ṭha takin goal kan venghim a, kan rilru put hmang a dik. Kan hmalam hunah rilru put hmang dik loh vangin kan tlawm tawh loh ka beisei," tiin a sawi.

Chelsea hian February 10 hian Eithad Stadium-ah Manchester City an tlawh dawn a, chak nawn a harsa dawn. Tun ṭuma hnehna an chan avangin point 50 an hmu a, palinaah insawn chhoin an goal difference ṭhat vangin nizana inkhelah Arsenal-in Manchester City an hneh a nih pawhin Champions League khel pha chinah an awm tho a rinawm.