Muanawma'n silver medal la

43rd Masters (Veteran) Badminton Championship 2019 chu Peddem Indoor Stadium, Goa-ah nimin khan khelh zawh a ni a, Mizo shuttler Lalmuanawma chuan 35+ men's singles-ah silver medal a la.

Inelna semifinal thleng pha chin hian Poland-a neih tur World Championship-ah India ai an awh dawn a, Muanawma pawh hi a tel dawn tihna a ni.

Seeded number 1 Muanawma hian nikum khan gold medal a la a, tun ṭumah erawh a ban a tihnat avangin final-a hian tun hmaa ṭum hnih a hneh tawh seeded number 5 Yogesh Chauhan, Himachal Pradesh chu 21-10, 9-21, 21-13 in an hneh lo. 

Inelnaah hian Mizoram aiawhin player 27 an kal a, nikuma 50+ mens doubles a semifinalist C. Lalzahngoa leh Lalthanzuala te chu seeded number 2 niin anni hi pre quarter final-ah an chak lo. 

F. Zokima pawh a telna category-ah seeded number 2 niin, ani pawh pre quarterfinal-ah a chak lo a. Zabiakthara leh K. Lalthlamuana te chuan quarterfinal an thleng.

Mizoram Badminton Association secretary H. Lalnunsiama (Mama) chu Badminton Association of India-in championship vil turin Tournament Committee member atan a ruat bawk.

Inelnaah hian category 40 a awm a, kum 35-70 inkar shuttler te chu men's singles, women's singles, men's doubles leh mixed doubles-ah te an inel a ni.