Khawvel barakhaihtu Asian champion Qatar

Asian Cup-ah khawvelin a beisei loh result a hmu a, quarterfinal vela an zinkawng tawp mai tura ngaih Qatar chu Asian champion thar an ni ta!

World Cup 2022 thleng tur ram hian Asian football powerhouse Japan chu final-ah 3-1 in an hneh a, khawvelin he result hi 'mak' tiin an sawi zui. 

Qatar tan hian Almoez Ali, Abdulaziz Hatem leh Akram Afif ten goal khat ṭheuh an khung a, Qtar-in 2-0 a hma an hruai laia Japan tana Takumi Minamino chuan Samurai Blue tan harhna a thlen zo lo. 

December 30 khan Qatari club Al Sadd SC tana khel Xavi chuan Qatari television channel Al Kass-ah Asian Cup champion tur rinna a nei a, Qatar a ring. 

Barcelona legend rinna hi mi tam takin an nuih a, tunah chuan a dik zia an hmu ta - Xavi hian final-ah Japan leh Qatar inhmachhawn tur thu a sawi thlap a, quarterfinal lut team pariat zingah pakhat chiah a tisual bawk. 

Qatar tan hian coach Felix Sanchez chu fak phu a ni a, ani hian 2013 aṭang khan Qatar Under 19 aṭangin team a enkawl ṭan a, AFC U19-ah 2014 khan a champion pui phawt. 

Under 20 leh 23 te enkawl tir leh a nih hnuah 2017 khan Qatar senior team hi a enkawl ṭan a, age level-a a lo hriat chian tawh a player-te rin chhunzawmin tun dinhmun hi an thleng. 

Qatar tan Almoez Ali chuan goal kua a khung a, Asian Cup tournament khata goal khung hnem ber record Iran legend Ali Daei (8 goals) lo siam tawh chu a khum. 

Kum 22 mi forward hi top scorer a nih piah lamah hian Most Valuable Player atan thlan a ni bawk. Ali chuan, "Tunah chuan World Cup 2022 kan thlir thei ang," tiin hma hun a thlir nghal. 

Qatar-in nomawi an chawina kawnga player pawimawh tak dang chu Akram Afif a ni. Villarreal winger hian goal khat khungin assist vawi 10 a nei a, final-ah hian Player of the Match atan thlan a ni. 

Qatar coach Felix Sanchez chuan, "History kan siam a, kan hnathawhah hian kan inchhuang hle tur a ni," tiin a sawi.