Hammers khelmualah champion tum Liverpool

Premier League hmahruaitu Liverpool chu zanin dar 1:30 hian a inlan dawn a,  match thum chhung a zawna chak tawh lo West Ham khelmualah an lenglut dawn. 

Liverpool hian kar hmasa Premier League-ah an elpui ber Manchester City chak loh chhawr ṭangkai thei loin Anfield-ah Leicester City an inhnehtawkpui a, champion duh tan point hloh nawn a thiang lo ang. 

Champions League a hnai leh tawh a, hemi in a ken tel chu fixture hautak a ni. Reds hian hnehna an chang zo lo leh a nih ngat chuan Premier League mai piah lamah Europe-a an dinhmun thlengin a nghawng tel ang. 

Heng zawng zawng ngaihtuah hian Liverpool tan 'pressure' a na a, Jurgen Klopp erawh a zam phah lo. Liverpool boss chuan, "Zam ṭhin mihring ka ni lo," a ti!

Liverpool fan-ten thawnthu hlui an keu let a nih chuan hlimna tur an nei a, Hammers an hmachhawn hnuhnung pali-ah Liverpool hian goal li aia tlem an khung ngai lo. 

Match hnuhnung pali-a vawi hnihah hian 4-0 in hnehna an chang a, match hnih dangah 4-1 in hnehna an chang thung - an inthlauhna hi a sang rem rem hle. 

Hetihrual hian Liverpool hi an 'form' lai ber a ni bik lo a, Premier League hmahruaitu tum dawn ro ro chuan tun hi a châkawm lai a ni ve thei. 

Reds hian inelna hrang hranga an match hnuhnung pangaah vawi hnih chiah hnehna an chang thei. Vawi hnih an tlawm a, vawi khat an khingpui an inhnehtawkpui. 

Mohamed Salah chu Liverpool player zinga thlir bik tur a ni a, match hnuhnung bera Leicester City laka 'bo' forward hian goal a khung an beisei dawn. 

'One season wonder' tia an sel hian amah sawiseltute chhangletin league-ah goal 16 a khung tling leh der tawh a, an la sawisel cheuna erawh mamawh hunah tak a 'bo' ṭhin tih hi a ni.

Salah hian Hammers bik hi vawi thum a hmachhawn tawhah goal li a khung a, London club hi a zuam viau tih a lang a, he "Salah' bawk hi fan-ten hmuh an inbeisei ang. 

AS Roma forward hlui hian Liverpool tan Premier League match 60-a inlan tawhah goal 48 a khung a, goal 50 khung tling tura a mamawh chu goal hnih chiah a ni ta. 

Liverpool tan Leicester laka hrem a nih hnuah James Milner chu a inkhel thei leh tawh dawn a, English midfielder hi a inlan a nih chuan Trent Alexander-Arnold a la inhliam avangin right back-ah chhawr a nih a rinawm. 

Joe Gomez  a la inhliam mek bawk a, ani hi a hma berah tun thla tawp hma chuan a dam lo ang. Centre back Dejan Lovren a la inhliam a, tlarhnung lam hi Reds buaina ber a ni rih. 

West Ham tan an striker chhuanvawr Marko Arnautovic chu inlan thei tawh tura beisei a ni a, Austrian striker tel hi chuan Hammers hi team dang daih an ni. 

Hammers goalkeeper Lukasz Fabianski leh defender Aaron Cresswell te chu dam hman tura beisei an ni a,  Samir Nasri chu a chawn hliam vangin a la inlan thei dawn lo thung. 

Liverpool-in Premier League nomawi an la chawi lo miau a, an player te lah player ṭha tak tia sawi tur ni hlawm mah se inkhel pressure sang takah hlawhtlinna an la tawng tam lo. 

Mahse, hetichung hian coach Jurgen Klopp erawh a talbuai lo. Borussia Dortmund tana league nomawi lo chawi tawh coach chuan, "Dortmund-a league nomawi ka chawi hma khan ka zam eih lo a, chu chu ka nihphung a ni," a ti. 

Klopp chuan chi aina tur engmah a la awm lo nia sawiin, "Ka tawnhriat aṭanga ka hriat chu chi ai vak hian eng thil ṭha mah a thlen lo tih hi a ni. Kan chhehvela thil thleng hi buaipui lutuk a ngai lo. Mahni hnathawh turah hian chian mai tur a ni. 

"Nomawi chawi tura in ṭha tawk a nih chuan in chawi mai ang a, in ṭha tawk lo a nih erawh chuan kawng lakah a thamral mai ang," a ti a, Premier League nomawi vanga zam a tum lo.