Juventus chelhtu Parma

Italian champion tan Cris­tia­no Ronaldo-a'n goal hnih khung mah se, an mikhual Parma forward Gervinho-a'n Portugual international khung zat a khung ve tlat avangin team pahnih 3-3 in an inhnehtawk.

Inrinni zan inkhel dangah pahnihna Napoli chuan Sampdoria 3-0 in an hneh ve thung a, champion lai Juventus hi an kaltluan rei hman em avangin match khelh zat inangah point kua ngawtin an la sang fal zawk tho a ni.

Juventus stadium-ah Ronal­do goal hmangin mualneitu lamin chawlhlawk laiin si khat faiin hma an hruai, Mas­similiano Allegri naute tan goal venhim bakah khung belh chu a harsa lo tura ngaih a ni.

Mahse, second half minute ruk chhungin goal thum a lut! Daniele Rugani-a'n (62mins) mawi zeta an goal hnihna a volley luh hnuah Antonino Barilla (64') chuan goal khat a tauh lut ve hlauh, Parma phur lai takin Ronaldo (66') chuan an goal thumna a khung.

Goal hnih an phurh hnuah Parma lam an beidawng bik lo. Arsenal forward hlui Ger­vinho-a'n hnai tak aṭangin Kucka hnen aṭanga a ball hmuh a khung a, Ivory Coast international hian hun tawp hma chiahin yard riat vel leka hla aṭangin an si phurh a sut zo.

Juventus manager Massi­miliano Allegri chuan, "Team inbuktawk tak kan nih a ngai, chawlhlawk hma chauh pawh khan goal li emaw tal chu khung thei tur kan ni. Mahse, kan vanduai ṭum a nih avangin goal khat chauh a lut," a ti.

Italian champion hian chawlhlawk hma chauh pawhin Parma goal a khung tumin vawi 17 an pet hman, mahse box hrul aṭanga Ronaldo-a'n a khung tih mai loh chu hlauhawm tak a awm thei bik lo.

Italian manager chuan sawi zawmin, "Kan goal nawr a na thawkhat hle, chutih rualin a hnung lam ven dan kan uluk zual a ngai bawk. Player inhliam hi chhuanlam a tling lo a, kan neih chhun leh khelmual chhunga lut apiangin Juventus khelh dan tur dik takin an khel tur a ni.

"Lazio leh Atalanta lakah tihsual kan nei tawh a, tunah Parma-in hun tawp dawnah kan goal-ah vawi hnih an khung. Goal hniha hma hruai hnua point hloh leh hi chu a fuh lo, chutih rualin hmahruaitu erawh kan la ni tho a, kan vawng nung reng tur a ni ang," tiin a sawi.

Juventus hian a zawnin Serie A nomawi vawi sarih an chawi tawh a, a vawi riat nan chawi leh an inbeisei mek. Real Madrid aṭanga Ronaldo an lakluh tawh bawk avangin tun hnaia an hlawhtlin theih lohna Champions League pawh an beisei sang hle. Mahse, vawi li an champion zawn tawhna Coppa Italia-ah erawh semifinal an lut phak lo.