Brown hoin Pune chak nghal

Derby County leh Hull City boss hlui Phil Brown enkawlna hnuaia an match hmasa ber­ah Pune City-in hnehna an chang nghal a, an mikhualna ramah season hmang chhe tak Chennaiyin FC chu chu 2-1 in an hneh. 

Chennaiyin tan hian CK Vineeth chuan minute 56-naah goal hmahruai khung mah se minute 59-naah Marcelinho chuan si phurh sutna goal a khung zui a, minute khat hnu lawkah chakna goal a khung nghal bawk. 

South Indian club Chennaiyin-in hnehna an chan theih loh avangin ISL table mawngphah luahlumtu an ni a, match 14 an khelh tawh aṭangin point nga chiah an la nei thei!

Chennaiyin tan Lal­dinliana Renthlei leh Zohmingliana Ralte ten inkhel bul an ṭan a, bench aṭanga luhtir Jeje Lal­pek­hlua'n goal a keng tel lo. 

Mizo tel lohna inkhel­ah FC Goa chuan match kua chhung a zawna la tlawm miah lo Mumbai City chu 2-0 in an lo hneh a, Edu Bedia leh Ferran Corominas ten goal khat ve ve an khung. 

FC Goa tana Coro goal khung hi penalty spot aṭanga a chhuih luh a ni a, tun season-a a goal 11-na niin ISL chanchinah goal khung hnem ber record a siam nghal - Iain Hume (28 goals) chu tlan sanin ISL-ah ngawr ngawr hian goal 29-a khungna a ni.

Zanin dar 7:30-ah Lal­lianzuala Chhangte leh Daniel Lalhlimpuia te khelh­na Delhi Dynamos chuan FC Goa an mikhual ang.