Leeds tlawmtu Norwich a chung berah!

Premier League khelh tuma Championship team inum boruak a sang chho zel - Leeds United chuan table-ah san falna remchang nei mah se an mikhual Norwich City chu 1-3 in an ngam lo a, pahnihnaah an tla thla. 

Leeds United hian hnehna chang se chuan point rukin table chung berah an awm ang a, an dinhmun a ṭha viau tura ngaih a ni - mahse beisei angin thil a kal lo a, minute ngana lekah goal hmasa ber an chhuah nghal. 

Norwich tan hian Mario Vrancic chuan minute ngana lekah freekick hmang­in goal hmahruai a khung nghal a, Teemu Pukki chuan minute 35-naah belhchhahin Vrancic vek hian minute 78-naah a khung leh bawk. 

Leeds United hian injury time-ah an goal neihchhun an khung ve chauh a, Patrick Bamford chuan an mualpho lutuk tur khuh nan a khung. 

Mahni muala khel Leeds United hian first half chhung ringawt pawh­in shot vawi 15 an nei hman a, mahse an van­neih ṭum a ni lo. 

Leeds an chak zawh tak lohah chuan pakhatna aṭanga parukna thleng hian an inkara point awm zat chu point sawm chiah a ni ta. 

Championship aṭang hian a sang pahnih hian season tharah Premier League an khel nghal dawn a, pathumna aṭang­a parukna thleng hian playoff khel lehin hmun ruak pakhat an inchuh ang.