Bayern Munich-in hun ṭha bawhpelh

Bundesliga nomawi vawi ruk chawi zawn thei Bayern Munich chuan an chunga awm Borussia Dortmund an hnaihchilh theihna tur hun ṭha an bawhpelh, point sarihin an hniam ta zawk a ni.

Niko Kovac-a nauten goal khung hmasa mah se Bayer Leverkusen lakah 3-1 in an tlawm a, inkhel dangah hmahruaitu Dortmund leh Eintracht Frankfurt te chu 1-1 in an inhnehtawk thung.

Chawlhlawk hma deuha Leon Goretzka tauh luh hmangin hma­hruai mah se, yard 20-a hla freekick aṭangin Leon Bailey-a'n a sut bakah Kevin Volland leh Lucas Alario ten an khung belh bawk. 

Substitute Alrio goal khung hi offside niin lang mah se video assistant referee hman a nih hnuah a offiside lo tih a lang a, goal thumna atan pawm a ni. Bayern lam hian Kingsley Coman leh Thomas Muller te hmangin hun ṭha nei mah se an chhawr ṭangkai thei tawh lo.

A zawna legaue match sarih chhung hnehna chang tawh Bayern an chak loh laiin Borussia Monchengladbach an lo chak avangin pathumnaah an tlak hniam rih a ngai a ni.

Bayern manager Kovac chuan, "Kan ṭum fuh lo ni a thleng, chutih rualin referee thutlukna fuh tawk lo sawi tur a awm bawk. Mahse, chhuanlam siam theih a ni lo, second half chhung chauha goal thum kan chhuah dan kha kan ennawn ang a, insiamṭhat nghal kan tum ang," a ti.

Kum 2012 hnua a vawi khat nan  Borussia Dortmund-in Bundesliga nomawi chawi leh theihna hun ṭha an nei a, kal fal zual theihna hun an neih erawh an chhawr ṭangkai thei bik lo.

Dortmund captain Marco Reus-a'n minute 22-na lekah goal­keeper Kevin Trapp dan hman lohin lei hrulah a khung, Germany international hian goal hnih­na khung teuh hle mah se wood­work a per hlauh. Frankfurt lam­in Serbia stri­ker Luka Jovic hmang­in an si phurh an sut thung a ni.