Valencia laka Barca chhantu Lionel Messi

Barcelona mualpho tur chhanhimtu chu tu dang ni loin Lionel Messi bawk a ni a, mahse tun ṭumah erawh hnehna a chanpui zo chuang lo - Valencia nen goal hnih khungin an inhnehtawk. 

Valencia hian minute 32 chhung lekin 2-0 in hma an hruai hman a, hmahruaitu Barca an mualpho dawn niin a lang. Mahse, Messi hian goal hnih khungin an si phurh a rawn sut zo a, point khat a team tan a hlawh chhuak. 

Nizan khan Barcelona hnaih bertu Atletico Madrid an inlan a, he thu buatsaih a nih lai hian result kan hre hman lo. Atletico hian hnehna an chan chuan Barca hi point thum chauhin an thlau tawh dawn a, nomawi inchuh boruak a nung sawt ang. 

Hetihlai hian nizan veka inlan Real Madrid tan chanchin lawmawm a thleng a, Champions League khel tura an elpui ber Sevilla an chak zo lo a, khualmualah 0-1 in Celta Vigo an ngam lo. 

Copa del Rey semifinal lut hlim Valencia-in Nou Camp-ah inkiltawihna an nei lo, an phur vanglai tak a nih bawk avangin huaisen takin Barca an nawr. 

Valencia hian hma takah Daniel Parejo hmangin chance duhawm an nei nghal a, Denis Cheryshev chuan post a rawn pet per nghal bawk - minute 24-naah goal hmahruai an khung ta nge nge. 

Counter attacking hmangin Atletico Madrid striker hlui Kevin Gameiro chuan an goal hmahruai a khung a, Rodrigo Moreno through ball pet ṭha tak zara goal hi khung thei a ni. 

Minute riat a liam chauh a, Valencia bawkin an goal hnihna an khung nawn. Sergi Roberto chu ṭul lo takin Daniel Wass  lakah a 'foul' a, penalty a chawi - Parejo chuan harsatna nei loin goal-ah a chantir. 

Nou Camp-ah Valencia-in Barcelona an ngam a, eng club mahin tlawh an chak ngai loh khelmualah Valencia an vawk lal len a, Barca ṭantu ten mak tiin an thlir. 

Mahse, Barca hian an zuai lai ber pawha kai harh ṭhintu player pakhat an nei a, a hming chu Lionel Messi a ni. Argentine forward hian minute 39-naah penalty hmangin si phurh a sut ṭhen. 

Goal dang lut loin  chawlhlawk hman a ni a, second half-a kan hmuh chu Messi bawk a ni. Minute 64-naah mawi zetin an si phurh a rawn sut leh a, tun season-a league goal 21-a khungna a ni der tawh!

Messi hi tun season-a European top five league-a goal 20 khung tling thei hmasa ber a ni a, inelna hrang hrangah match 27 khelin goal 29 zet a khung tawh a, a thiam fal zia hmuh turin a awm zel. 

Kum 31 mi Messi hian minute 90 khel mah se hliam neichungin khelmual a chhuahsan a, Barca boss Ernesto Valverde chuan ngaihtuahawm lutuk erawh a nih loh thu a sawi. 

Spanish coach chuan, "Ka ngaihdanah chuan hliam hlauhawm lutuk niin a lang lo. Doctor ten chiang takin a dinhmun an en leh ang a, eng ang taka na nge a nih chu a hriat ang," a ti.

 

Messi dinhmun chiang tak hi he thu buatsaih a nih lai hian hriat a la ni lo a, Nilaini zan Copa del Rey semifinal-a Real Madrid nena an inkhel turah a inlan hman beisei a ni. 

Valverde chuan inkhel chungchang sawi nghalin, "Mi chuan eng pawh an sawi thei a, mahse keini chuan hnehna chan ngei tumin theihtawp chhuahin kan khel a ni," a ti a, league nomawi chawi an tum thu a sawi zui.