Pro Fight-ah state pa-ruk boxer inlan dawn

Tata Motors Yodha 4x4 LPS Pro Fight chu February 5 hian khelh ṭan a ni dawn a, state pawn aṭanga boxer tel tur a hriat ta. Arunachal Pradesh leh Meghalaya aṭangin boxer pathum ve ve bakah Manipur, Assam leh Sikkim aṭangin pahnih ṭheuh an tel ang.

Pro Fight hi R. Dengṭhuama Indoor Stadium, Mualpuiah neih ṭan tur a ni a, March 12 zanah 'Title Fight' hmangin khar a ni ang. Tualchhung boxer inlan tur 193 chuan January thla tawp khan inbukna an nei fel tawh a, state panga aṭanga Pro Fight-a tel turte hian round of 16 aṭangin an khel ṭan dawn.

Tripura leh Nagaland-in sawmna an tihlawhtling thei lo mah se hmarchhak state dang pangain an tihlawhtling. Inelna buatsaihtute hian state pawn aṭangin boxer nazawng tel a phal lo a, a sawm chinte hi chu anmahni state championship-a medal la tawh an nih loh pawhin national championship-a tel phak an nih a ngai. State panga aṭangin 12 an tel dawn a, middle leh lightheavy-a inlan tur an awm lo va, lightfly, bantam leh light-ah boxer pali ṭheuh an tel thung dawn a ni.

Manipur boxer-in ngaihven an hlawh a, bantam-ah W Alexander leh light-ah Khoinaijam S Singh an tel dawn a, Khoinaijam hi Manipur lightweight champion lai a ni.

Assam aṭangin 2016 Senior National-a tel pahnih Rubul Mirdha (lightfly) leh Abdul Mannan (bantam) an tel dawn, Sikkim aṭangin Raj (lightfly) leh Suk Raj Rai (light) an inlan dawn bawk.

Meghalaya lamin Elite National Championship-a tawn hriat nei mi pathum an thawh chhuak, Shillong boxer vek an ni. Lightfly-ah Meghalaya number 1 Pynskhern L Nonglait, bantam-ah Justerwell Jyrwa leh light-ah Elite National-a vawi thum khel tawh Dondor Marwein chuan Mizo leilungah fiahna an hmachhawn ang.

Arunachal Pradesh hian a vawi khat nan Aizawla inhnek turin boxer pathum an feh chhuahtir. Heli Tana Tara (lightfly), Kogam Potom (bantam) leh Poken Siga (light) te hi national senior-a tawn hriat nei vek tawh niin Tara hi 2017 state champion a ni a, Potom leh Siga te hian ṭum hnih ve ve state-ah an champion tawh a ni.