PSG-in Neymar an chhan

French radio station RTL chuan Neymar chungchangah mipui ngaihdan lain poll an siam a, poll chhang zinga 84% zet chuan Brazilian forward hian a khelh dan hmangin defender ho a 'zah lo/ti thinrim' ṭhin ni-ah an ngai!

Paris St-Germain chuan hemi chungchangah hian an player chu chhanin an website-ah Neymar-a'n a thiamna leh theihna hmanga player a bum lai vel an pholang a, "Engmah hi i thlak a ngai lo e," tiin an ziak a, an thuchhuahah poll siam chu "thil ṭul lo tak a ni," tiin an sawi bawk. 

Neymar hi January 23-a Strasbourg nen an inkhelh ṭumin hliam vanga lakchhuah a ni a, he inkhelah hian second rei lote chhungin Moataz Zemzemi chuan vawi thum a ti tlu hman a, Neymar hian a hnuah mawi zetin Zemzemi hi a pir khum vel.

Mahse, Neymar hi hliam vangin lakchhuah a ni zui a, Strasbourg midfielder Anthony Goncalves chuan, "Neymar-a tih dan phung a ni a, player ropui tak a nih avangin ka zah em em. Mahse, khatianga in show chiam hnuah pet i nih chuan, ṭap duh suh," tiin mittui nena khelmual chhuahsantu Neymar a kap zui. 

Pound maktaduai 200 man Neymar hi kar 10 chhung chu a hliam vang hian a inlan thei dawn lo a, Manchester United nena last 16 match hnih an khelh turah a inlan thei dawn lo tihna a ni.