Monaco chakna Fabregas

Cesc Fabregas chuan AS Monaco a zawm hnua a goal hmasa ber chu Toulouse lakah a khung a, Spain international hian a club thar hi 2-1 a chak puiin beiseina thar a siamsak.

Inrinni zan inkhelah Monaco tan Aleksandr Golovin-a'n minute 15-naah goal hmahruai khung mah se, Toulouse lamin minute nga hnu lekah Christopher Jullien hmanga sutin; team talbuai Monaco an buai chhunzawm zel dawn niin a lang hman.

Amaherawhchu, Monaco lam hian minute 62-naah Arsenal midfielder hlui Fabregas hmangin goal hnihna khung lehin, an hum tluan thei. Leonardo Jardim-a'n a hna ngai a chelh nawn hnua a match hmasa berah point thum a hlawh chhuah pui.

Monaco hian season an hmang fuh lo a, an manager Jardim hi banin Thierry Henry an lalut. Mahse, Henry hian hmasawn aiin a hnungtawlh zawngin a kalpui a, an ban hnu Portuguese manager bawk an lalet.

Kum 44 mi Jardim-a naute tan hna hmabak a la tam dawn, match 23 aṭanga point 18 chauh an la hmuh avangin table-ah 18-na an ni a, an hnuaiah hian Amiens (18 points) leh Guingamp (14) te chiah an awm.