Tottenham Hotspur fapa chuam Son-a

Premier League club Tottenham Hotspur-in Harry Kane leh Delle Alli te an chhawr loh laiin chhantu an mamawh a, Asian tlangval Son Heung-min chu London club mamawh chhanna a ni. South Korean forward hian minute 83-naah Newcastle United lamah a khung a, Spurs 1-0 in an chak.

Tottenham hian transfer hun hnunhnung pahnihah player lakluh an nei lo a, chutichung chuan champion tura inum Liverpool leh Manchester City an elpha. Mauricio Pochettino hote hian hnehna an chan avangin point 57 hmuin pahnihnaah an awm a, player inhliam leh stadium sak vanga player lei nana sum an theh chhuak thei lo chunga champion thei zinga an awm hi an fakawm hle.

Wembley Stadium-ah substitute Fernando Llorente siam chu Son-a'n goal-ah a chantir a, Newcastle keeper  Martin Dubravka dem theih mah se South Korean forward erawhin fak a phu takzet. Son hian Spurs tana match hnuhnung 10-ah goal kua a khung a, London club hian Asian Cup-a South Korea tlak hma an vanneih pui tih pawhin a sawi theih bawk.

Tottenham manager Mauricio Pochettino chuan, "Sonny hi battery ang mai a ni a, a theihna a tawp hma chu a theihna zawng zawngin a khel ṭhin. Khelmual chhunga a luh tawh chuan 100% in a theihna a lanchhuahtir ṭhin," tiin a fak.

Spurs hian Premier League record thar an siam a, match 29 chhung draw nei loin an kaltluang tawh a, kum 2011-a Bolton-in match 28 chhung draw nei loa an kaltluan chu an khum ta chiah a ni.

Cardiff City chuan Inrinni zan khan Bobby Reid-a goal hnih hmangin Bournemouth chu an mualah an hneh. Welsh club hian an player manto ber ni tura an lakluh Emiliano Sala chu thlawhtheihna chetsualnaa a bo tak avangin team chhung boruak a dan phah a, manager Neil Warnock pawhin a hmalam hun thlenga a ngaihtuahna a sen hman thu a sawi.

Warnock chuan, "Inkhelh hmain ka naute bulah Sala tan kan khelh ṭhat a ṭul thu ka sawi a, kan club kha kil tinah kan inlungrual hle a ni. Kan club chairman Mehmet Dalman leh chief executive Ken Choo te chungah te, kan supporter-te chet dan pawh a ropui takzet a, football manager inchhuang ber ka ti ta ve ang," tiin a sawi a, inkhel entu mipui pawhin hun tawp lamah Sala hming lamin an zai rual bawk.

Inkhel dangah Burnley-in an player thar Peter Crouch an ṭhat pui a, English striker pa sang Crouch hian Jack Stephens kut tauh perin penalty a hlawh chhuak. Burnley tan Ashley Barnes chuan penalty hi khungin Southampton nen 1-1 in an inhnehtawk.